Qaraǵandyda ıen dalada adasyp 3 kún júrgen eki adam qalaı qutqaryldy

QARAǴANDY. QazAqparat - Qaraǵandy oblysy Prıozersk qalasynan Qarajal qalasyna qaraı avtokólikpen jolǵa shyqqan eki adam dala kezip úsh kún júrgen, dep habarlaıdy QazAqparat.

3 maýsymda shamamen joldyń ortasynda olardyń kóligi buzylyp, Prıozersk qalasyna jaıaý oralýǵa sheshim qabyldaıdy.

Sol mańdy jaqsy bilmegen soń birneshe kún boıy dalada júrgen. Uıaly baılanys istemeıdi, telefondarynyń batareıasy taýsylǵan.

Qolda bar shaǵyn sý qory tez bitti. Birneshe kún ishinde joǵalǵandar shamamen 100 shaqyrym jer júrgen.

Onyń biri qatty sharshaǵan soń qaraýsyz ǵımaratta qalady. Al ekinshisi saparyn ári qaraı jalǵastyrdy.

6 maýsymda tańerteń ıesiz ǵımaratta qalǵan er adam batareıasy otyryp kalǵan telefonyn az ǵana ýaqytqa qosyp, qutqarýshylarǵa qońyraý shaldy. Ol óziniń ornalasqan jerin aıtyp úlgergen.

Qutqarý jumysyna Prıozersk qalasy tótenshe jaǵdaılar bóliminiń bastyǵy Maqsat Abıýrov, Prıozersk qalasy qutqarý bólimshesiniń basshysy Berik Ahmetov jáne №15 órt sóndirý bóliminiń aǵa júrgizýshisi Asylbek Hızırov shyqty.

Uzaq izdegennen keıin qutqarýshylar Prıozersk qalasynan shamamen 120 shaqyrym jerde joǵalǵandardyń bireýin tapty. Ol seriginiń shamamen qaıda júrgenin habarlady.

Biraq bul baǵytta ony tabý múmkin bolmady. Qutqarýshylar joǵalǵan adamnyń qaıda ekenin jerdegi iz arqyly anyqtady. Іzdeý jumysy keshke deıin jalǵasty.

Ekinshi adam ábden álsirep, úmitin úzgen soń «bireý kórip qala ma» degen úmitpen ot jaqqan. Onyń úmiti beker bolǵan joq. Іzdeý toby tútindi kórip, joǵalǵan adamdy tez tapty.

Qutqarylǵandardyń qýanyshynda shek bolmady. Olarǵa sý berip, tamaqtandyryp, Prıozersk qalasyna jetkizdi.

Qaraǵandy oblysynyń TJD alysqa saparǵa shyqqanda qarapaıym qaýipsizdik sharalaryn saqtaýdy usynady: shyǵý aldynda kóliktiń durystyǵyn tekserińiz, týystaryńyzdy eskertińiz, qaıtý ýaqytyn belgileńiz, baılanys quraldaryn ózińizben birge alyńyz, kórinetin baǵdarlardy únemi qadaǵalańyz.