Qaraǵandyda Golovkın – Alvares jekpe-jegi úlken ekrandardan kórsetiledi

QARAǴANDY. QazAqparat – Qaraǵandylyqtar Golovkın – «Kanelo» jekpe-jeginiń translıatsııasyn úlken ekrandardan kóre alady, dep habarlaıdy QazAqparat tilshisi.

Jeksenbi, 18 qyrkúıek kúni Gennadıı Golovkın men meksıkalyq Saýl «Kanelo» Alvares arasynda sýper orta salmaqtaǵy absolıýtti álem chempıony ataǵy úshin úshinshi aıqas ótedi. Bul tıtýldarǵa qazir Alvares ıe. Qaraǵandylyqtar jekpe-jekti qalanyń eki úlken ekranynan kóre alady.

Qaraǵandy qalasy ákimdiginiń málimetinshe, jekpe-jek Jańa Maıqudyq mádenıet úıiniń (Magnıtogorskaıa kóshesi, 19) jáne «Shahter» stadıonynyń shyǵys trıbýnasynyń janyndaǵy LED-ekrandarda kórsetiledi. Bastalýy saǵat 07:00-de.

Aıta keteıik, Gennadıı 1982 jyly Qaraǵandy qalasynda dúnıege kelgen.

Buǵan deıin habarlaǵanymyzdaı, Golovkın – «Kanelo» kezdesýi Las-Vegas (AQSh, Nevada shtaty) qalasynda ótedi. Osy boks keshi eki talantty sportshynyń básekelestiginde núkte qoıýy tıis. Sebebi osyǵan deıingi eki jekpe-jektiń alǵashqysy teń eseppen aıaqtalsa, ekinshisi meksıkalyq boksshynyń paıdasyna sheshildi.

Jalpy qazaqstandyqtar boks keshin Qazsport telearnasynan tikeleı efırden kóre alady.

Foto: sports.kz