Qaraǵandyda gaz ballony jarylyp, 2 adam aýrýhanaǵa tústi

QARAǴANDY. QazAqparat - Qaraǵandyda gaz ballony jaryldy. Saldarynan 4 páter zardap shekti, eki adam aýrýhanaǵa jetkizildi, dep habarlaıdy QazAqparat tilshisi.

Oqıǵa búgin, 21 qańtar kúni saǵat 18:51-de Qaraǵandy qalasyndaǵy Şors kóshesi, 37-úıde boldy.

«Eki qabatty turǵyn úıde gaz ballony jaryldy (kólemi 5 l). Órt bolǵan joq. Jarylys saldarynan №6 (2-shi qabatta) jáne ishinara №4, 5 (2-qabatta) jáne 3 (1-qabatta) páterlerde aǵash qabyrǵalar qırap, aldyn ala boljam boıynsha úıdiń 36 sharshy metr alańy búlindi», - dep habarlaıdy Qaraǵandy oblysy Tótenshe jaǵdaılar departamentiniń baspasóz qyzmetinen.

Jarylys saldarynan 53 jastaǵy er adam men 54 jastaǵy áıel zardap shekti. Olar kúıik jaraqattarmen Qaraǵandy qalasyndaǵy oblystyq medıtsına ortalyǵyna jatqyzyldy.

Oqıǵa ornynda oblystyq TJD-niń 36 qyzmetkeri jáne 8 tehnıkasy jumys istep jatyr.

Qala ákimdigi baspanalary búlingen turǵyndarǵa jataqhanadan oryndar usyndy. Oqıǵanyń mán-jaıy anyqtalyp jatyr.