Qaraǵandyda ferma jylqy alýǵa berilgen 26 mln teńgeni basqa nársege jumsaǵan
11:17, 03 Shilde 2020
QARAǴANDY. QazAqparat - Qaraǵandy oblysynda memlekettik baǵdarlama boıynsha bólingen nesıeni maqsatsyz paıdalaný faktisi anyqtaldy, dep habarlaıdy QazAqparat.
Qarjy monıtorıngi komıtetiniń Qaraǵandy oblysy boıynsha ekonomıkalyq tergeý departamentiniń qyzmetkerleri jedel izdestirý sharasy barysynda Buqar jyraý aýdanyndaǵy sharýa qojalyǵynyń isin áshkereledi.
Sharýa qojalyǵy «Agrobıznes» memlekettik baǵdarlamasy aıasynda «Agrarlyq kredıt korporatsııasynan» asyl tuqymdy jylqy satyp alýǵa 26 mln teńge nesıe alǵan. Sóıtip bul qarjyny maqsatsyz paıdalanǵan.
Qazirgi tańda anyqtalǵan fakti boıynsha sotqa deıingi tergeý júrip jatyr.