Qaraǵandyda er adam tanysyn ólgenshe uryp-soǵyp, aýlada qaldyryp ketken

QARAǴANDY. QazAqparat – Qaraǵandyda er adam tanysyn uryp-soǵyp, ony es-tússiz kúıde páterden shyǵaryp tastaǵan. Marqumnyń denesi kópqabatty úıdiń aýlasynan tabyldy, dep habarlaıdy QazAqparat tilshisi.

Oqıǵa 19 shildede tańǵy saǵat 4:30 shamasynda bolǵan. Qaraǵandy qalasy PB jedel basqarý ortalyǵyna áldekimniń er adamdy páterden shyǵaryp, ony kópqabatty úıdiń kireberisine tastaǵany týraly habarlama túsedi. Oqıǵa ornyna Qaraǵandy qalasy PB Jańa-Maıqudyq polıtsııa bóliminiń jedel-tergeý toby barady. Máıitten kóptegen dene jaraqaty anyqtalǵan. Kóp uzamaı tártip saqshylary jábirlenýshiniń jeke basyn anyqtap, onyń 44 jastaǵy qala turǵyny ekeni belgili boldy.

«Kýágerlerden surastyrý barysynda kópqabatty úı páterleriniń birinde jábirlenýshi men onyń tanysy 38 jastaǵy er adamnyń arasynda janjal týyndaǵany belgili boldy. Kúdikti ustalyp, tergeý úshin polıtsııa bólimine jetkizildi. Aıtýynsha, janjal barysynda ol tanysyn jaraqattaǵan, al esinen tanyp qalǵan kezde jábirlenýshini páterden aýlaǵa shyǵarǵan», - dep habarlady Qaraǵandy oblysy PD baspasóz qyzmetinen.

Atalǵan faktige qatysty QR QK 106-baby 3-bóligi «Abaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý» boıynsha qylmystyq is qozǵaldy. Tergeý amaldary júrgizilip jatyr.