Qaraǵandyda er adam karantınde jatqan áıeline tereze arqyly jasyrynyp kirgen

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev tótenshe jaǵdaı kezinde adamdardyń karantın aýmaǵyna kirip ketý jaǵdaıy týraly aıtyp berdi, dep habarlaıdy QazAqparat tilshisi.

«Tótenshe jaǵdaı kezinde adamdar karantın aýmaǵyna kirip ketýge tyrysyp jatyr. Sońǵy táýlikte tótenshe jaǵdaı rejimin buzǵany úshin Ákimshilik quqyqbuzýshylyq kodeksiniń 476-baby boıynsha 137 adam jaýapqa tartyldy, 89-y qamaldy. Olardyń bári de óz áreketteriniń zańǵa qaıshy ekenin moıyndady», - dedi mınıstr «Habar 24» arnasyndaǵy onlaın rejımdegi baspasóz máslıhatynda.

Dáýren Abaev keı jaǵdaıda tipti aqylǵa syımaıtyn jaǵdaılar tirkelip jatqanyn aıtady.

«Qaraǵandyda óziniń burynǵy áıeliniń palatasyna tereze arqyly kirmek bolǵan er adam 10 táýlikke qamaldy. Áıeli karantınde jatqan. Ol Germanııadan kelgen. «Nelikten?» degen suraq týyndaıdy» - deıdi ol.