Qaraǵandyda er adam 9 kóliktiń terezesin syndyryp, keıin anasyn óltirgen

QARAǴANDY. QazAparat – Qaraǵandynyń 34 jastaǵy turǵyny úı aýlasynda turǵan birneshe kóliktiń áınegin syndyrdy. Polıtseıler sol kúni ol óziniń anasyn óltirgenin anyqtady, dep habarlaıdy QazAqparat tilshisi.

3 maýsym kúni saǵat 00.35-te «102» pýltine Qaraǵandy qalasy Gapeev kóshesindegi № 29 úıdiń aldynda er adam aýlada turǵan toǵyz avtomobıldiń áınegin syndyrǵany týraly habarlama túsken.

«Atalǵan fakti boıynsha QR Qylmystyq kodeksiniń 293-baby 1-bóligi (buzaqylyq) boıynsha sotqa deıingi tergeý bastaldy. Qaraǵandy qalalyq polıtsııa polkiniń narıady osy úıdiń 34 jastaǵy turǵynyn «izin sýytpaı« ustady. Ol buryn sotty bolmaǵan. Kúdikti polıtsııanyń Ońtústik-Shyǵys bólimine jetkizildi. Narkologııalyq dıspanserde júrgizilgen medıtsınalyq kýálandyrý boıynsha ustalǵan azamattyń densaýlyq saqtaý organdarynda narkologııalyq jáne psıhıatrııalyq esepte turmaıtyny anyqtaldy», - dep habarlady Qaraǵandy oblysy Polıtsııa departamenti bastyǵynyń tergeý jumysy jónindegi orynbasary Ernat Qalıaqparov.

Tártip saqshylary kúdiktiniń jeke basyn jáne ol jasaǵan asa aýyr emes qylmysty eskere otyryp, tergeý áreketterin júrgizgennen keıin eki saǵattan soń er adamdy úıine jibergen.

Alaıda, sol kúni saǵat 07.55-te joǵaryda atalǵan mekenjaıdaǵy páterlerdiń birinen áıeldiń máıiti tabylǵany týraly habarlama túsken. Áıel sol kúni túnde kólikterdiń terezesin syndyrǵan er adamnyń 70 jastaǵy anasy ekeni anyqtaldy.

«Jedel-izdestirý sharalary barysynda krımınaldyq polıtsııa qyzmetkerleri qala kósheleriniń birinen kúdiktini ustady. Ol kórshilerine keltirilgen zalaldy óteý boıynsha anasymen týyndaǵan janjal barysynda oǵan pyshaq jaraqatyn salǵanyn aıtty», - dep málim etti Ernat Qalıaqparov.

Atalǵan fakti boıynsha QR QK-niń 99-baby (Kisi óltirý) boıynsha qylmystyq is tirkeldi.