Qaraǵandyda ekologııalyq taza jem óndirile bastaıdy

QARǴANDY. QazAqparat – Qaraǵandy oblysynda qus, mal jáne balyq úshin jasyl jem shyǵarý josparlanýda. Bul týraly QazAqparat ákimdikke silteme jasap habarlaıdy.

Jańa tehnologııanyń arqasynda Izraıl ınvestorlary qazaqstandyq ettiń biregeı brendin jasaýǵa ýáde berip otyr. QR Premer-Mınıstriniń orynbasary Roman Sklıar Qaraǵandy oblysyna jumys sapary barysynda aýyl sharýashylyǵy janýarlary men balyqtarǵa arnalǵan jasyl jemshóp óndirisi boıynsha jobamen tanystyryldy.

«Saryarqa» EEA aýmaǵynda aýyl sharýashylyǵy janýarlary men qustarǵa arnalǵan túıirshiktelgen baıytylǵan jasyl jem óndirý jobasy iske asyrylady. Zaýyttyń biregeıligi shıkizat bóligindegi múldem jańa tásilde. Jasyl jemdi ósirý úshin ózdiginen jasalǵan kóp deńgeıli gıdroponıkalyq qondyrǵylar qoldanylady. Ekologııalyq taza azyqta aýyl sharýashylyǵy maldary men balyq etin óndirý múmkindigi paıda bolady. Bul joǵary sapaǵa qol jetkizýge jáne «Qazaqstanda jasalǵan!» biregeı brendin qurýǵa múmkindik bepedi, – deıdi «Virgin Soil Kz» JShS dırektory Dmıtrıı Abıldın.

Investorlardyń aıtýynsha, óndiris ızraıldik jáne halyqaralyq ǵalymdardyń gıdroponıkalyq agronomııa salasyndaǵy kópjyldyq zertteýlerine negizdelgen. Kásiporynda jyl boıy quramynda mıkroelementter kesheni bar joǵary sapaly jasyl jem shyǵarýǵa ýáde beriledi.

Investıtsııalar shamamen 27 mlrd teńgeni quraıdy jáne myńǵa jýyq jańa jumys oryndary qurylady dep josparlanýda. Óndiris qýattylyǵy – kúnine myń tonnaǵa deıin azyq.

Qazirgi ýaqytta EEA aýmaǵynda zaýyt qurylysyna jer telimi bólingen. Jobalaý jumystary júrgizilýde. Qurylys bıyl bastalyp, 2022 jyly aıaqtalady dep josparlanýda.

Jobanyń bastamashysy – «Qaraǵandy-bekire» JShS – óńirde balyq salasyndaǵy tabysty qyzmetimen tanymal. Segiz jyl boıy oblysta bekire fermasy jumys isteıdi. Klımattyq jaǵdaılardy eskere otyryp, ol jabyq sýmen jabdyqtaý tehnologııasy boıynsha quryldy.

2020 jyly kásiporyn 1,5 tonna qara ýyldyryq jáne 20 tonnaǵa jýyq bekire etin óndirdi. Qýat óndiristi ulǵaıtýǵa múmkindik beredi. 2023 jylǵa deıin jylyna 20 tonna ýyldyryq jáne 300-350 tonna bekire etin shyǵarý josparlanýda.

«2020 jyly ónimniń bir bóligin Reseıge eksporttadyq. Geografııany keńeıtýge nıettimiz. El ishinde bizde turaqty klıentter bar. Biz qurama jemderdiń zamanaýı tehnologııasyn óndirý boıynsha jobaǵa qatysamyz. Biz balyq jeminiń jelisin damytamyz. Bul shıkizat jetkizýshilerge táýeldi bolmaýǵa múmkindik beredi», – dedi Dmıtrıı Abıldın.