Qaraǵandyda eki jasar balanyń murnynan dárigerler 10 tiri qurt alyp shyqty

QARAǴANDY. QazAqparat – Qaraǵandynyń dárigerleri eki jasar balanyń murnynan 10 tiri qurt shyǵardy. Ata-anasy búldirshinniń muryn qýysynda bóten dene qansha kúnnen beri jatqanyn bilmeıdi, dep habarlaıdy QazAqparat tilshisi.

Eki jasar balanyń ata-anasy 18 shildede oblystyq balalar klınıkalyq aýrýhanasyna júgingen. Olar 19 shildede qaıta shaqyrylyp, balany dárigerler teksergennen keıin aýrýhanaǵa jatqyzyldy. Anasynyń aıtýynsha, qyz balanyń murnynan jaǵymsyz ıis 3-4 kún buryn paıda bolǵanyn ájesi sezgen. Alaıda dárigerge balanyń murnynan qan kete bastaǵanda júgingen.

«Qabyldaý bólimine JMK brıgadasy 2,6 jastaǵy qyzdy murynnan qan ketýmen jáne murnynda bógde dene bar degen kúdikpen alyp keldi. Rınoksopııa kezinde oń jaq muryn jolynan bógde deneler (gýbka, tiri qurttar) tabyldy», - dep habarlady Qaraǵandy oblystyq klınıkalyq aýrýhanasy.

Belgili bolǵandaı, balanyń murnynda 10 tiri qurt pen gýbkanyń bir bóligi bolǵan.

«Muryn qýysyna mehanıkalyq sanatsııa júrgizildi. Jalpy anestezııamen muryn joldary men sınýstardy endoskopııalyq tekserý josparlanýda. Orofarıngealdy farıngoskopııada erekshelik joq, jutý áreketi erkin, tamaq erkin keledi, daýysy jaqsy, bala belsendi. Sınýs rentgenografııa nátıjesinde sınýsıttiń kataraldy qubylystaryn anyqtadyq», - dep qosty balalar klınıkalyq aýrýhanasy.

Dárigerler bul sırek kezdesetin jaǵdaı deıdi.