Qaraǵandyda «Dúnıege keler áli talaı Qasym» aqyndar baıqaýynyń jeńimpazdary marapattaldy

QARAǴANDY. QazAqparat - Qaraǵandyda aqyn Qasym Amanjolovtyń shyǵarmashylyǵyna arnalǵan «Dúnıege keler áli talaı Qasym» atty respýblıkalyq aqyndar baıqaýy ótti, dep habarlaıdy óńir basshysynyń resmı saıty.

Baıqaý Qaraǵandy oblysynyń tilderdi damytý jónindegi basqarmasymen «Rýhanı jańǵyrý» baǵdarlamasy aıasynda uıymdastyryldy.

Ótken jyldan bastap baıqaý respýblıkalyq deńgeıde ótkiziledi. Bul joly baq synaý úshin Qazaqstannyń túpkir-túpkirinen 42 adam ótinim berdi. Qazylar alqasy 7 óńirdiń 15 úzdik úmitkerin tańdady. Qatysýshylardyń jasy 18-den 40-qa deıingi aralyqta. Olar Qasym Amanjolovqa, Ábish Kekilbaevqa arnaýlar jáne erkin taqyryptaǵy týyndy sekildi úsh taqyrypta óleńderin usynýlary tıis bolatyn.

Baıqaý qorytyndysy boıynsha bas júldeni Almaty oblysynan Muhtar Kúmisbek ıelendi. Oǵan 500 000 teńgege sertıfıkat tabys etildi. Qazylar alqasy birinshi oryndy Balqash qalasynyń aqyny Maqat Kúzemhanǵa taǵaıyndady. Ekinshi oryndy Nur-Sultannan kelgen Ularbek Nurǵalym jáne Jambyl oblysynan Tabıǵat Abaıldaev bólisti. Úshinshi oryndy Temirtaýdan kelgen Tańsaýle Erkin, Nur-Sultannan kelgen Oljas Qasym jáne qaraǵandylyq Erkin Naryn ıelendi. Baıqaýdyń jeńimpazy men laýreattary dıplomdarmen jáne aqshalaı syılyqtarmen marapattaldy. Aıta ketken jón, «Dúnıege keler áli qalaı Qasym» poetıkalyq baıqaýy 2009 jyldan beri ótkizilip keledi. Osy jyldar ishinde oǵan 300-ge jýyq adam qatysty. Uıymdastyrýshylardyń aıtýynsha, baıqaýdyń maqsaty – jastar arasynda Qasym Amanjolovtyń ádebı murasyn nasıhattaý, poezııadaǵy jańa esimderdi anyqtaý, olardyń shyǵarmashylyǵyn qoldaý, táýelsiz eldiń jetistikterin, onyń tarıhı ótkenin jáne jarqyn bolashaǵyn dáripteý.