Qaraǵandyda daıyn qujattardy HQO-dan úıge jetkizý qyzmeti iske qosyldy

QARAǴANDY. QazAqparat – Qaraǵandylyqtar daıyn qujattardy HQO-dan 8ıge jetkizýge tapsyrys bere alady. Jańa qyzmet Halyqqa qyzmet kórsetý ortalyqtarynda iske qosyldy. Úıge jetkizý qyzmeti anyqtamalar men qujattardyń 150 túri boıynsha qoljetimdi, dep habarlaıdy QazAqparat tilshisi.

Qyzmetti qujattardyń daıyn ekendigi týraly SMS-habarlama alǵannan keıin jeke silteme boıynsha rásimdeýge bolady. Kelisken jaǵdaıda klıent habarlamadaǵy silteme boıynsha ótedi jáne jetkizý mekenjaıyn toltyrady. Budan ári qyzmet qunyn tóleý qajet. Búgingi kúni qala sheginde ol 970 teńgeni quraıdy. Kýrer poshtany tapsyrys berilgen sátten bastap bir jumys kúni ishinde jetkizedi.

«Biz qyzmet kórsetý úderisi barynsha qolaıly bolyp qana qoımaı, daıyn qujatqa qaıta kelý qajettiligi týyndamaýy úshin qosymsha servıster quramyz. Adamdardyń jumystan ketýge, qaıta kelýge nemese balalardy úıde qaldyrýǵa árdaıym múmkindigi bola bermeıtinin bilemiz», – deıdi Qaraǵandy oblysy boıynsha «Azamattarǵa arnalǵan úkimet» memlekettik korporatsııasynyń baspasóz qyzmetiniń basshysy Qýanysh Seıithanov.

Esterińizge sala keteıik, ótken jyldyń sáýir aıynda «Azamattarǵa arnalǵan úkimet» memlekettik korporatsııasy Nur-Sultan, Almaty jáne Shymkent qalalarynda daıyn qujattardy jetkizý qyzmetin iske qosty. Endi bul qyzmet Qaraǵandyda da qoljetimdi.