Qaraǵandyda dárigerlerge merekelik palaý ázirlendi

QARAǴANDY. QazAqparat - Qaraǵandyda Qazaqstan halqy Assambleıasynyń oblystyq fılıaly dárigerlerge merekelik túski as uıymdastyrdy. Jerlesterimizdiń ómirin qaýipti indetten qutqara otyryp, aldyńǵy shepte eren eńbek etip jatqan dárigerler erekshe kóńil men qoldaýǵa ıe boldy, dep habarlaıdy QazAqparat tilshisi.

Mereke kúnine oraı Qaraǵandydaǵy aýrýhanalardyń birine úlken qazanmen ózbek palaýy jetkizildi. «Birlik» etnomádenı birlestiginiń jetekshisi Bahtııar Ysqaqov dárigerlerdi ulttyq taǵammen tamaqtandyrý úshin Qazaqstan halqynyń birligi merekesi kúni tańnan bastap qazan-oshaqtyń janynda as ázirleýmen aınalysqan. Sondaı-aq, dástúrli tandyr nan pisirdi.

«Biz osy kúnderi oblysymyzda aýqymdy túrde ótip jatqan #Ulttaǵamdary chellendjin qoldadyq. Bul jaı ǵana aktsııa emes, bizdiń aq halatty abal jandarymyzǵa qoldaý kórsetý jáne alǵys aıtý, olarǵa kúsh-jiger men densaýlyq tileý múmkindigi. Meıiz qosylǵan merekelik palaý – bul óte paıdaly taǵam. Ony myńjyldyqtar boıy ata-babalarymyz daıyndaǵan. Barlyq qazaqstandyqtardy merekemen quttyqtaımyn. Osy jyly biz ony erekshe atap ótemiz, karantın jaǵdaıynda jáne jappaı oqshaýlaýda. Biraq biz soǵan qaramastan bizgemiz!» - dep atap ótti Bahtııar Ysqaqov.

Barlyq saqtyq sharalardy qoldana otyryp, etnomádenı berlestik ókilderi taǵamdy koronavırýs juqtyrǵandardy emdeıtin aýrýhana qyzmetkerlerine tapsyrdy. Bul dárigerler óz jumys oryndarynan alshaqtamaǵaly jáne jaqyndaryn kórmegeli kóp bolǵan.

Sondaı-aq, QHA músheleri Uly Otan soǵysynyń ardageri Búrkit Esjanovqa baryp, aqsaqaldy 1 mamyrdan merekesimen quttyqtady.

«Beıbitshilik pen birlikti saqtaý óte mańyzdy. Bul bizdiń basty ıgiligimiz. Tek birlesip qana barlyq qıyndyqtardy jeńemiz», - deıdi 97 jastaǵy aqsaqal.