Qaraǵandyda Buqar jyraýdyń 355 jyldyǵyna oraı respýblıkalyq konferentsııa ótti

QARAǴANDY. QazAqparat – Qaraǵandy Dostyq úıinde Buqar jyraý Qalqamanulynyń 355 jyldyǵyna arnalǵan respýblıkalyq konferentsııa ótti. Іs-sharany uıymdastyrýshy – Qazaqstan musylmandary dinı basqarmasy.

«Buqar jyraý Qalqamanuly búkil ómirin el birligine arnady. Buqar jyraýdyń rýhanı murasy urpaqtan-urpaqqa beriletin bolady. Ata-babamyzdy dáripteı otyryp, biz ulttyq qundylyqtarymyzdy dáripteımiz», – dedi Qaraǵandy oblysynyń ákimi Ermaǵanbet Bólekpaev.

Buqar jyraý - XVIII ǵasyrdyń kórnekti memleket qaıratkeri. Qazaq hany Abylaıdyń bas keńesshisi bolǵan.

Tóle bı, Qazybek bı jáne Áıteke bımen birge Qazaqstan tarıhynda tuńǵysh ret «Jeti jarǵy» zańdar jınaǵyn qurýǵa qatysqan.

Biraq bárinen buryn jyraý retinde tanymal bolǵan. Tolǵaýlarynda aqyn óz zamanynyń ózekti máselelerine toqtalyp, olarǵa jaýap berýge tyrysqan.

Sondaı-aq shyǵarmashylyǵy arqyly jastarǵa keńes bergen.

«Respýblıkalyq konferentsııa uly babamyz Buqar jyraýǵa arnalyp otyr. Biz osyndaı kezdesýlerdi ata-babamyzdy eske alý jáne olardyń jumysyn nasıhattaý úshin uıymdastyramyz», – dep atap ótti Qazaqstannyń bas múftıi Naýryzbaı qajy Taǵanuly.

Konferentsııaǵa E. A. Bóketov atyndaǵy Qaraǵandy ýnıversıtetiniń rektory Nurlan Dýlatbekov pen Qaztutyný odaǵy Qaraǵandy ýnıversıtetiniń rektory Erqara Aımaǵambetov, Májilis depýtaty Amanjol Áltaev jáne zııaly qaýym ókilderi, ustazdar men din qyzmetkerleri qatysty.