Qaraǵandyda belgisiz bireýler qaladaǵy eskertkishterdi búldirip ketti

QARAǴANDY. QazAqparat – Qaraǵandynyń ortalyq kóshesinde belgisiz bireýler avtobýs aıaldamalarynyń pavılondary men kenshiler astanasynyń qurylǵan kúni jazylǵan qalanyń pasportyn shımaılap ketken. Polıtsııa tártip buzǵan adamdardy izdep jatyr.

Olar tabylǵan jaǵdaıda 20 AEK mólsherinde aıyppul salynady, dep habarlaıdy QazAqparat tilshisi.

Vandalızm aktisi týraly beıneni Qaraǵandy qalasynyń Qazybek bı aýdanynyń ákimi Eraly Ospanov áleýmettik jelilerdegi paraqshasynda jarııalady.

«Mende «sýretshige» birneshe suraǵym bar. Nege? Nelikten ? Jáne bul ne ózi ?... Tym quryǵanda, bul oıý-órnekter neni bildiretinin túsindirse eken. Nelikten olar osy sýretti úılerinde salmaıdy eken ? Bul qabyrǵalardy jumysshylar boıady, ter tógip eńbek etti. Árıne, biz ony qaıta boıaımyz. Biraq muny istegenderge meniń jekeme jazýyn ótinemin. Sizder ony ne úshin salǵandaryńyzdy túsindirińizdershi», - dep jazdy aýdan ákimi.

Aıta ketý kerek, vandaldar sáýlet eskertkishin ǵana emes, Abaı kóshesindegi úılerdiń qabyrǵalary men aıaldama pavılondaryn da shımaılaǵan.

Barlyq jerde buzaqylar birdeı túsiniksiz beıneni salǵan. Bul óz kezeginde turǵyndardyń narazylyǵyn týdyrdy. Áleýmettik jeliler arqyly jurtshylyq kinálilerdi jazalaý kerek deıdi. Qazir polıtsııa kúdiktilerdi kóshelerdegi beınebaqylaý kameralary arqyly anyqtaýǵa kiristi. Qalanyń abattandyrylǵan jerleriniń búliný faktisi boıynsha is qozǵaldy.

«Abaı kóshesindegi úıler men aıaldamalardy boıaý faktisi polıtsııada tirkeldi. Qazirgi ýaqytta ýchaskelik polıtsııa ınspektorlary atalǵan kúdikti azamatty izdeýde. Ustalǵan jaǵdaıda olarǵa QR ÁQBtK 505-babyna sáıkes 20 AEK mólsherinde aıyppul salynýy múmkin», - dep túsindirdi Qaraǵandy oblysy PD baspasóz qyzmetiniń basshysy Baqytjan Qudııarov.