Qaraǵandyda balalardyń ýlanýy: Jumystan shettetilgen dárigerler qaıda júr

ASTANA. QazAqparat – Balalardyń ýlaný oqıǵasynan keıin Qaraǵandy oblysynyń arnaýly áleýmettik qyzmet kórsetý ortalyǵynyń 10 qyzmetkeri qaıtadan óz jumysyna kiristi. Bul týraly Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova aıtty, dep habarlaıdy QazAqparat tilshisi.

«Osy fakti boıynsha oblysta komıssııa qurylyp, ony oblys ákiminiń áleýmettik máselelerge jetekshilik etetin orynbasary basqarady. Sol kezde bul medıtsınalyq-áleýmettik mekemede bala ólimi tirkelgen edi. Sodan keıin komıssııa medıtsına qyzmetkerlerin belgili bir merzimge jumystan shettetý týraly sheshim qabyldady», - dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń aıtýynsha, keshe komıssııanyń sheshimimen atalǵan medıtsınalyq-áleýmettik mekemedegi 10 medıtsına qyzmetkeri óziniń jumysyna qaıta kiristi. Qalǵan eki medıtsına qyzmetkeri, ıaǵnı bólim meńgerýshisi men psıhıatr dáriger jumystan shettetilgen.

Eske salsaq, 30 shildede Qaraǵandy oblysynyń Balalarǵa arnaýly áleýmettik qyzmet kórsetý ortalyǵynda birneshe bala ýlanyp, olardyń bireýi qaza taýyp, altaýy jansaqtaý bólimine jetkizildi.

Tamyz aıynyń basynda Sotqa deıingi tergeý aıaqtalǵanǵa deıin tekserý kezinde ortalyq dırektorynyń mindetin atqarýshy jáne osy ortalyqtyń 12 medıtsına qyzmetkeri jumystan jáne óz mindetterin oryndaýdan shettetildi.

Densaýlyq saqtaý mınıstri Ajar Ǵınııat habarlaǵandaı, dáriger mamandar balalar toksıkalyq zattan qatty ýlanýy múmkin ekenin aıtyp otyr.