Qaraǵandyda aıt merekesi kúnderi qurbandyqqa mal shalý oryndary anyqtaldy

QARAǴANDY. QazAqparat – Bıyl Qurban aıt merekesi 9 shildede bastap, úsh kúnge sozylady. Qaraǵandyda qurbandyqqa mal shalýǵa bolatyn úsh pýnkt anyqtaldy, dep habarlaıdy QazAqparat tilshisi.

Arnaıy mal soıý pýnktteri Reznık, 18 («Abısheva A. O.» JK), Gogol, 2/23 («ARAI KZ» JShS) jáne S. Seıfýllın, 53 («Hasenov» ShQ) mekenjaılarynda jabdyqtalǵan. Olar veterınarlyq qyzmettiń veterınarııalyq-sanıtarııalyq qorytyndysyn alǵan.

Halyqtyń sanıtarlyq-epıdemıologııalyq salaýattylyǵy jáne tamaqtan ýlanýdyń, toksıkoınfektsııalardyń, jiti ishek ınfektsııalarynyń paıda bolýyna jol bermeý úshin Qurban aıt merekesi kezinde oblystyń bas sanıtar dárigeriniń jańa qaýlysy shyǵaryldy. Óńirde qurbandyq shalý pýnktterinde sanıtarlyq normalardyń, et tasymaldaý jáne saqtaý jónindegi sanıtarlyq-epıdemıologııalyq qaǵıdalar talaptarynyń saqtalýyna baqylaý kúsheıtiletin bolady.

Ettiń sapasyn, qaýipsizdigin rastaıtyn qujattardyń, sondaı-aq tamaq ónimderimen baılanysy bar, medıtsınalyq tekserýden ótken jáne jumysqa ruqsaty bar qyzmetkerlerdiń, qyzmet kórsetýshi personaldyń jáne basqa da adamdardyń jeke medıtsınalyq kitapshalarynyń bolýy tekseriledi.

Qaýly osy jyldyń 8 shildesinen bastap kúshine enedi.