Qaraǵandyda avtokólik órtený jaǵdaılary jıilep ketti

QARAǴANDA. QazAqparat – Eki apta ishinde Qaraǵandy oblysynyń aýmaǵynda avtomobıl kóliginde 14 órt boldy. Jyl basynan beri oblysta barlyǵy 198 kólik órti tirkelgen, dep habarlaıdy QazAqparat tilshisi.

Avtokóliktegi órtterdiń negizgi sebebi - otyn nemese elektr júıesiniń aqaýy (elektr symdarynyń qysqa tuıyqtalýy).

Qysqy ýaqytta da órt qatyp qalǵan kólikterdi ashyq otty qoldaný arqyly jylytý kezinde bolady.

«Mehanızmder men elektr jabdyqtarynyń aqaýlarymen avtokólik quraldaryn uzaq ýaqyt boıy paıdalaný, ártúrli qosymsha elektr jabdyqtaryn ruqsatsyz paıdalaný kóbinese elektr jabdyqtarynyń qyzyp ketýine, sondaı-aq qysqa tuıyqtalýyna ákeledi. Avtokólik ıelerine kólikke ýaqytyly tehnıkalyq qyzmet kórsetýden ótý jáne jóndeý jumystaryn júrgizý, jaramdy órt sóndirgish salyp júrý usynylady», - dep habarlady Qaraǵandy oblysy TJD baspasóz qyzmeti.

Sonymen qatar órt sóndirýshiler kólikti ot sharpyǵan kezde ne isteý kerektigin aıtty:

- Eger avtomobıl jansa, 101 nómirine qońyraý shalýdy umytpańyz;

- Órt sóndirýshiler kelgenge deıin órt sóndirgishti alyp, kapotty sál ashyp, órt sóndirgish zatty kapot astyndaǵy keńistikke baǵyttańyz;

- Sondaı-aq órtti sóndirý úshin qum men jerdi paıdalanýǵa bolady.