Qaraǵandyda aýyl mektebiniń túlekterine UBT-ǵa daıyndalýǵa kómektesedi
Mundaı bastamany Samgau akademııasy iske asyrmaq. Ol Qaraǵandy oblysynyń bilim basqarmasymen jáne «Saryarqa adaldyq alańy» jobalyq keńsesimen memorandým jasasty.
«Ótken jyly bizdiń akademııa 110 túlekti tegin oqytyp úlgerdi. Onyń 23-i grantqa tústi. Osy jyly biz aýyldyq mektep oqýshylaryn, áleýmettik qorǵalmaǵan toptardan shyqqan jáne múgedektigi bar balalardy tegin oqytýdy jalǵastyrýǵa nıettimiz. Arnaıy baǵdarlama arqyly osyndaı myńǵa jýyq balany onlaın-oqytýmen qamtý josparlanýda», – dep atap ótti Samgau jobasynyń dırektory Ardaq Jakın Óńirlik kommýnıkatsııalar qyzmeti platformasynda ótken brıfıngte.
Tegin oqýdy qajet etetin túlekterdiń tizimin bilim basqarmasy jasaıdy.
Sondaı-aq, atalǵan sanattarǵa jatatyn on birinshi synyp oqýshylarynyń ata-analary olardy WhatsApp-8-705-234-07-53 nómiri nemese bilim jobasynyń saıty arqyly óz betinshe jaza alady.