Qaraǵandyda Assambleıa ókilderi kómekke zárý jandarǵa qol ushyn sozdy

QARAǴANDY. QazAqparat - Qaraǵandy oblysynyń Qazaqstan halqy Assambleıasynyń músheleri óńirdiń muqtaj turǵyndaryna kómek kórsetýde. Sońǵy birneshe kúnde turmysy tómen otbasylarǵa birneshe tonna azyq-túlik taratyldy, dep habarlaıdy QazAqparat tilshisi.

«Tatar jáne bashqurt Qazaqstan kongresi» respýblıkalyq qoǵamdyq birlestiginiń Qaraǵandy oblysy boıynsha fılıalynyń tóraǵasy Shamıl Osın turmysy tómen otbasylarǵa 12 tonna azyq-túlik pen kókónis berip, kómek kórsetti. Al tájik etnomádenı birlestiginiń ókilderi Ánet Baba meshitiniń ortalyq shtabyna alǵashqy qajetti azyq-túlik jetkizdi.

«Búkil álem men elimiz óte kúrdeli kezeńdi bastan keshken ýaqytta birlik pen yntymaqtyq tanytýdyń mańyzy zor. Koronavırýs indeti biz úshin ortaq qaýip bolyp tabylady jáne ol ult nemese dindi tańdamaıdy. Biz, qazaqstandyqtar, kóptegen synaqtardy bastan keshirgen elmiz. Bul joly da qıyndyqty jeńemiz dep senemiz. Eldegi TJ jáne Qaraǵandy oblysynda jarııalanǵan karantın saldarynan kóp azamattar ózin eń qajetti azyq-túlikpen qamtamasyz ete almaı qaldy», - deıdi Qaraǵandy oblystyq QHA ókilderi.

Sondaı-aq, «Jańǵyrý joly» jastar qozǵalysy aımaqtyq shtabynyń eriktileri qoǵamdyq kólik júrgizýshilerine medıtsınalyq betperde berýdi jalǵastyrýda jáne jedel járdem qyzmetkerlerine ystyq tamaq berýdi uıymdastyrady. Analar keńesiniń músheleri maskalar tigedi jáne olar túski as daıyndaıdy.

«Bul jumys jalǵasady. Qıyn ýaqyttarda qaıyrymdylyq kórsetý – bizdiń ortaq paryzymyz», - dep esepteıdi QHA ókilderi.