Qaraǵandyda áskerı qyzmetshiler aýmaqtar men ǵımarattardy dezınfektsııalaýǵa kómektesýde

QARAǴANDY. QazAqparat – Qaraǵandyda áskerı qyzmetshiler aýmaqty, ǵımarattar men nysandardy dezınfektsııalaıdy. QR Qorǵanys mınıstrligi qala bıligine kómek retinde radıatsııalyq, hımııalyq jáne bıologııalyq qorǵanys bólimsheleriniń sarbazdaryn jiberdi, dep habarlaıdy QazAqparat tilshisi.

Dezınfektsııalaý jumystaryn áskerı qyzmetshiler 26 naýryzda bastady. Búgin temirjol jáne avtovokzaldardy arnaıy óńdeý júrgizildi.

Oblystaǵy epıdemıologııalyq jaǵdaı turaqty. Koronavırýstyq ınfektsııanyń jańa jaǵdaılary tirkelgen joq. Eki patsıent emdeý kýrsyn alýdy jalǵastyrýda.

Táýlik boıy baqylaý jasaıtyn karantınde 314 adam bar. Bul 1A sanatyndaǵy elderden oralǵan nemese shartty túrde juqtyrǵan adamdarmen baılanysta bolǵan azamattar. Taǵy 152 adam úı jaǵdaıynda karantınnen ótýde.

Oblysta 9000-nan astam nysanda sanıtarlyq-dezınfektsııalyq rejım kúsheıtildi. Mindetti qaýipsizdik sharalarynyń oryndalýy qadaǵalanady. Tártip buzýshylyqtar nysandardyń qyzmetin toqtatýǵa deıin qatań jaza qoldaný arqyly joıylýda.

Tártip buzýshylarǵa qatysty polıtseıler sotqa 45 ákimshilik is tapsyrdy. 12 derek boıynsha kináliler aıyppul tóleıdi. 5-i ákimshilik qamaýǵa alyndy. Qalǵan 28 is aldaǵy kúnderi qaralatyn bolady.