Qaraǵandyda ashyq qudyqqa bala túsip ketkennen keıin qaqpaqty urlaǵandar izdestirilýde

QARAǴANDY. QazAqparat - Qaraǵandyda ashyq turǵan káriz qudyǵyna qyz bala qulap ketti. Osyǵan baılanysty jergilikti kommýnaldyq qyzmet ashyq jatqan qudyqtyń ıesin izdep jatyr, dep habarlaıdy «QazAqparat» HAA tilshisi.

«Qazir qudyqtyń ıesin anyqtap jatyrmyz. Ol jerden «Qaraǵandy sý» kompanııasynyń káriz qubyrlary nemese «Qazaqtelekomnyń» baılanys jelileri ótýi múmkin. Qudyq sol mańaıdaǵy Serik Sápıev atyndaǵy boks ortalyǵyna tıesli bolýy da ǵajap emes», - deıdi qalalyq kommýnaldyq sharýashylyq bóliminiń basshysy Eskendir Qabıdolla.

Onyń aıtýynsha, qaraýsyz jatqan qudyqtyń ıesi jaaýapqa tartylýy qajet.

«Qaqpaqty urlaǵan eken, birden zań oryndaryna shaǵymdanyp, ornyna birden jańasyn qoıý kerek bolatyn. Tipti bolmaǵan jaǵdaıda qudyqtyń mańaıyn qorshalýy tıis. Sondaı-aq, qyzmetkerlerimiz urylardy anyqtap, olardy jaýapqa tartqan kezderi de bolǵan. Bul jaǵdaıdy da nazarda ustaımyz», - dedi bólim basshysy.

Eske sala keteıik, 19 jeltoqsan kúni Serik Sápıev atyndaǵy boks ortalyǵynyń mańyndaǵy ashyq jatqan káriz qudyǵyna qyz bala qulap ketken bolatyn. Ony mańaıdan ótip bara jatqan áskerı qyzmetker Záýre Shaqabaeva shyǵaryp alǵan edi.