Qaraǵandyda alǵashqy ІT dárigerler daıyndaldy

QARAǴANDY. QazAqparat – Qaraǵandyda «IT medıtsına» ınnovatsııalyq bilim berý baǵdarlamasynyń alǵashqy 38 túlegine dıplomdar tabystaldy. Jas mamandar eki salanyń – aqparattyq tehnologııalar men densaýlyq saqtaý júıesiniń baılanystyrýshy býyny bolady, dep habarlaıdy QazAqparat tilshisi.

Bakalavrıat deńgeıinde jańa bilim berý baǵdarlamasyn 2019 jyly eki JOO – Ábilqas Saǵynov atyndaǵy Qaraǵandy tehnıkalyq ýnıversıteti jáne Qaraǵandy medıtsına ýnıversıteti ázirlep, ashqan bolatyn. Búgingi tańda osy mamandyqty tańdaǵan 80 stýdent densaýlyq saqtaýda qoldanylatyn aqparattyq tehnologııalardy, baǵdarlamalaý quraldaryn, málimetter bazasyn, bıomedıtsınalyq aqparatty óńdeý jáne taldaý ádisterin úırenedi.

«Bizdiń elimizde medıtsınada kóptegen zamanaýı aqparattyq tehnologııalar engizilip jatyr. Dáriger zertteý júrgizgennen keıin derekterdi óńdeý kerek. «IT medıtsına» bilim berý baǵdarlamasy biregeı: Qazaqstanda joǵary oqý oryndary arasynda mundaı yntymaqtastyq joq. Bizde medıtsınalyq oqytýmen tehnıkalyq oqytýdy tolyqtyrý júrip jatyr. Oqý tórt jylǵa sozylady. Bizdiń mamandar birden eki salada quzyretti bolady. ІT dáriger – bolashaqtyń kásibi», – deıdi Ábilqas Saǵynov atyndaǵy Qaraǵandy tehnıkalyq ýnıversıteti Aqparattyq-esepteý júıeleri kafedrasynyń meńgerýshisi Alekseı Kalının.

Jańa baǵdarlama boıynsha oqıtyn stýdentter emhanalar men dárihanalarda tájirıbeden ótedi. Medıtsınalyq derekterdi óńdeýmen aınalysatyn ІT mamandaryna úlken qajettilik bar. Sondaı-aq, ІT dárigerler respýblıkalyq medıtsınalyq zertteý ortalyqtarynda suranysqa ıe. Sondaı-aq, oqýdy jalǵastyrýǵa bolady. Mysaly, Qaraǵandy medıtsına ýnıversıtetiniń ómir týraly ǵylymdar ınstıtýtynyń «Bıomedıtsına» bilim berý baǵdarlamasyna magıstratýraǵa túsýge bolady.

«Bıomedıtsına – barlyq jaratylystaný-ǵylymı mamandyqtardyń ókilderin shaqyratyn keń baǵyt dep aıta alamyn. Buǵan bıoınformatıka da kiredi – genom qurylymyn matematıkalyq ádistermen zertteý jáne molekýlalyq-genetıkalyq mehanızmderdi, patologııalyq protsesterdiń mehanızmderin jáne taǵy basqalaryn ártúrli zertteý. ІT dárigerler úshin de óz orny bar. Bul algorıtmderdi qurý, derekterdi taldaý, aqparattyq júıeler», - deıdi Qaraǵandy medıtsına ýnıversıtetiniń strategııalyq damý jáne halyqaralyq yntymaqtastyq jónindegi prorektory Vıktor Rıklefs.

«ІT medıtsına» baǵdarlamasy boıynsha oqyǵandar túsken ýnıversıtettiń dıplomyn alady. Bul – aqparattyq-kommýnıkatsııalyq tehnologııalar bakalavry nemese densaýlyq saqtaý bakalavry. Ár dıplomda eki ýnıversıtettiń pánderi men baǵalary bar eki transkrıpt bar, ıaǵnı túlekterdiń shyǵý quzyrettiligi birdeı.

«IT medıtsına» bilim berý baǵdarlamasy boıynsha joǵary oqý ornyn qyzyl dıplommen bitirgen Tamyrlan Aldýnǵarov oı bólisti.

«Men ýnıversıtetke túsýge daıyndalyp jatqanda baǵdarlamashy bolǵym keldi. UBT tapsyrdym jáne tehnıkalyq ýnıversıtette meniń salama sáıkes keletin birneshe baǵdarlama bar ekenin bildim. Meni ІT medıtsına qyzyqtyrdy. Bul – beıindi jáne qıyn mamandyq. Meniń aǵam oblystyq onkologııalyq ortalyqta hırýrg-onkolog bolyp jumys isteıdi. Men jaı baǵdarlamashy emes, ómirimdi medıtsınamen baılanystyrǵym keletinin túsindim. Onyń ústine, bizdiń elimizde osyndaı mamandardyń jetispeýshiligi bar. Oqýdy ári qaraı jalǵastyrǵym keledi, damımyn, mindetti túrde magıstratýraǵa túsemin», - deıdi 21 jastaǵy prezıdenttik stıpendıat.

Bıyl jańa bilim berý baǵdarlamasyna talapkerlerdi qabyldaý jalǵasady.