Qaraǵandyda Ahmet Baıtursynuly týraly fılmniń premerasy ótti

QARAǴANDY. QazAqparat – Qazaqtyń kórnekti aǵartýshysy, ǵalym, qoǵam qaıratkeri, «Alash» partııasynyń múshesi Ahmet Baıtursynulynyń 150 jyldyǵyna oraı túsirilgen derekti fılm tanystyryldy, dep habarlaıdy QazAqparat tilshisi.

«Ulttyń rýhanı kósemi» kınokartınasy Qazaqstan halqynyń Tilderi kúnine arnalǵan merekede kópshilikke usynyldy. Fılm Ahmet Baıtursynulynyń Qarqaraly aýdanyndaǵy ómiri men jumysy týraly baıandaıdy. Túsirilim Aqterek aýylynda ótti.

«Derekti fılm – mádenıet, arhıvter jáne qujattama jáne tilderdi damytý basqarmalarynyń, Saryarqa telearnasy men bizdiń kınoteatrdyń birlesken jobasy. Fılmde Ahmet Baıtursynulynyń osy aýyldyń mektebinde sabaq bergen kezindegi ómiri kórsetilgen. Ol sonymen qatar osy oqý ornynyń negizin qalaýshy jáne qurýshysy. Qazir bul mektep tarıhı-mádenı mura obektisi mártebesin aldy jáne memlekettiń qorǵaýynda. Al janynda Ahmet Baıtursynovtyń esimimen atalatyn jańa mektep salyndy», - dedi «Saryjaılaý» kınoteatry dırektorynyń orynbasary Noıan Júnisov.

Eki kúnge sozylǵan túsirilimge Aqterek aýylynyń turǵyndary qatysty. Olardyń qatarynda Ahmet Baıtursynuly atyndaǵy mekteptiń muǵalimderi men balalary bar. Sondaı-aq, S.Seıfýllın atyndaǵy Qaraǵandy oblystyq qazaq teatrynyń kásibı akterleri tartyldy. Ahmet Baıtursynulynyń rólin Ahaı Jumamuratov oınady.

Jaqyn arada 30 mınýttyq kartına Saryarqa telearnasynda kórsetiledi jáne basqarmalardyń áleýmettik jelilerinde qoljetimdi bolady. «Saryjaılaý» kınoteatry bul fılmmen Aqterek aýylyna barady.