Qaraǵandyda Abaı eskertkishi ashyldy

QARAǴANDY. QazAqparat – Qaraǵandyda uly aqyn Abaıǵa eskertkish ashyldy. Bul týraly Qaraǵandy oblysynyń ákimi Jeńis Qasymbek óziniń Facebook-tegi paraqshasynda jazdy, dep habarlaıdy QazAqparat.

«Bıyl elimiz uly Abaıdyń 175 jyldyǵyn atap ótýde. Halqymyzdyń birtýar perzentiniń shyǵarmashylyǵy arqyly biz gýmanızmdi, adaldyq pen eńbekqorlyqty boıymyzǵa sińirip kelemiz. Al onyń qara sózderi arqyly rýhanı qundylyqtarymyzdy qalyptastyrýdamyz.

Abaıdyń shyǵarmashylyq murasyna arnalyp uıymdastyrylǵan júzdegen is-shara uly tulǵanyń darynyn jańa qyrynan tanytyp keledi,-dep jazdy ákim.

Onyń sózinshe, oblys ortalyǵynyń eń jaıly jáne kórikti kósheleriniń birine Abaı esimi berilgen.

«Búgin Abaı qalasynda ultymyzdyń uly ustazyna arnap eskertkish ashyldy. Atalǵan sharaǵa qoǵam jáne memleket qaıratkeri Saýytbek Ábdirahmanuly, abaıtanýshy ǵalym Ǵarıfolla Esim, aıtysker aqyn Amanjol Dúısenbaıuly, «Abaı akademııasy» ǵylymı zertteý ınstıtýtynyń dırektory Erlan Ernazaruly arnaıy keldi.
Jobanyń avtory Qazaqstan Sýretshiler odaǵynyń múshesi Beıbit Mustafın»,-dep jazdy Jeńis Qasymbek.

Onyń sózinshe, atalǵan mádenı nysannyń ashylý saltanatyna oraı aýdandyq mádenıet úıiniń alańy men qasbetin qaıta qurý jáne abattandyrý jumystary júrgizildi. Sonymen qatar eskertkishtiń ashylý saltanatyna oraılastyrylyp jergilikti aqyndardyń «Abaı jaqqan bir sáýle...» atty shyǵarmalar jınaǵy men M.Áýezovtiń «Abaı joly» roman-epopeıasynyń álemniń 18 tilindegi dısktik jınaǵy shyǵaryldy. Kitaptardy tsıfrlaý Shahtınsk qalasynyń ortalyq kitaphanasymen birlesip júrgizildi.
«Oblysymyzdyń barlyq turǵyndaryn osynaý mádenı nysannyń ashylýymen shyn júrekten quttyqtaımyn»,-deıdi oblys ákimi.