Qaraǵandyda 75 adamdy qaǵazda bar, ómirde joq jumysqa ornalastyrǵan

QARAǴANDY. QazAqparat – Qaraǵandy oblysynda 75 azamatty jumysqa ornalastyrýdyń jalǵan faktileri anyqtaldy. Buǵan qosa 54,5 mln teńge somaǵa 36 grant negizsiz berilgen jáne paıdalanylǵan. Osy jáne basqa da kemshilikterdi oblystyq prokýratýra qyzmetkerleri anyqtaǵan, dep habarlaıdy QazAqparat tilshisi.

Oblys prokýratýrasy memlekettik grant berý kezinde halyqty jumyspen qamtý týraly zańnamanyń birneshe ret buzylǵanyn anyqtaǵan.

Tekseris barysynda 58 mln teńgeni tıimsiz paıdalaný, 20 mln teńge somasynda grantty maqsatsyz paıdalaný deregi de belgili bolǵan.

1691 jumyssyz azamatty oqytqan soń jańadan alǵan mamandyǵy boıynsha 44% nemese 760 adam ǵana jumysqa ornalastyrylǵan.

«Mysaly, Osakarov aýdanynda 2021 jyly 10 mıllıon teńge bıýdjet qarajatyna talap etilmegen mamandyqtar boıynsha 65 adam oqytylyp, nátıjesinde 10 adam ǵana jumys tapqan. 54 mıllıon teńge somasyna 36 grant negizsiz berilgen jáne nysanaly maqsaty boıynsha paıdalanylmaǵan. Grant bıznes sýbektilerine óndiristi keńeıtýge jáne jańa jumys oryndaryn ashýǵa arnalǵan. Bıznes-ıdeıalardy iske asyrýǵa alynǵan memlekettik grant oqytýǵa jáne basqa da maqsattarǵa jumsalǵan», - dedi Qaraǵandy oblysy prokýratýrasynyń qoǵamdyq múddeni qorǵaý basqarmasynyń bastyǵy Bekzat Ahmetov.

Nysanaly toptarǵa jatpaıtyn Qaraǵandy, Shahtınsk, Abaı, Aqtoǵaı aýdandarynda 9,8 mıllıon teńgege 9 grant berildi.

11 kásipker 6,4 mıllıon teńgege grant alǵannan keıin óz qyzmetin toqtatqan.

Nátıjesinde josparlanǵan jańa jumys oryndary qurylmaǵan. Sonymen qatar azamattardy jalǵan jumysqa ornalastyrýdyń 75 faktisi anyqtaldy.

Bul oryndarǵa basqa uıymdardyń qyzmetkerleri nemese jumys istep júrgen qyzmetkerler «ornalastyrylǵan».

«Bas prokýratýranyń tapsyrmasy boıynsha jergilikti atqarýshy organdardyń ishki eńbek naryǵyn qorǵaýǵa, jumyspen qamtýǵa járdemdesýge, sondaı-aq 2021-2022 jyldary jumyssyzdar men ózin-ózi jumyspen qamtyǵandardy nátıjeli jumyspen qamtýǵa tartýǵa baǵyttalǵan zańnamanyń saqtalýyna tekserý júrgizildi. Onyń barysynda zańnamanyń jáne halyqty jumyspen qamtýdyń jáne memlekettik grant berý qaǵıdalarynyń buzylǵany anyqtaldy», - deıdi Qaraǵandy oblysy prokýratýrasynyń qoǵamdyq múddeni qorǵaý basqarmasynyń prokýrory Botakóz Saılaýbaeva.

Qazirgi ýaqytta prokýrorlyq qadaǵalaý aktileri jasaldy, aldaǵy ýaqytta eńbek naryǵyn qorǵaý salasynda baqylaý kúsheıedi.