Qaraǵandyda 400-den astam egde ánshi soǵys jyldaryndaǵy ánderdi shyrqaıdy

QARAǴANDY. QazAqparat - Qaraǵandy oblysynda «Ardagerler án salady» atty hor ujymdarynyń dástúrli festıvali ótedi, dep habarlaıdy QazAqparat tilshisi.

Bıyl festıval 29-shy ret ótkizilgeli otyr. Án festıvali Jeńis kúnine jáne Keńes Odaǵynyń Batyry Núrken Ábdirovtyń 100 jyldyq mereıtoıyna arnalady.

«Ardagerler án salady» XHІH Oblystyq festıvali 3 mamyrda Jezqazǵan qalasynyń Dostyq jáne halyqtar mádenıeti úıinde ótedi. Sharaǵa oblystyń barlyq qalalary men aýdandarynan 20 hor ujymy jınalady dep kútilýde. Sahna tórinde 55 pen 85 jas aralyǵyndaǵy 450 ánshi óner kórsetedi. Qatysýshylar soǵys jyldaryndaǵy jáne patrıottyq ánderdi shyrqaıtyn bolady.

Festıval tańerteńgi 10.00-de merekelik sherýmen bastalady. Sharaǵa qatysýshylar Jeńis kóshesiniń boıymen júrip ótip, «Dańq alleıasy» memorıalanyń aldyna gúl shoqtaryn qoıady. 12.00-de Dostyq úıinde kontserttik baǵdarlama bastalady.

Festıvaldi Qaraǵandy oblysynyń Mádenıet, muraǵattar jáne qujattar basqarmasy men Qazaqstan Respýblıkasy ardagerler Uıymynyń oblystyq fılıaly birlesip uıymdastyryp otyr.