Qaraǵandyda 350 mln teńgeniń kontrabandalyq temeki ónimderi anyqtaldy

NUR-SULTAN. QazAqparat – Qaraǵandy oblysynda 350 mıllıon teńgeden astam somanyń kontrabandalyq temeki ónimderi anyqtaldy. QazAqparat bul týraly QR Qarjylyq monıtorıng agenttigine silteme jasap habarlaıdy.

Bıylǵy 6 qazanda QR Qarjylyq monıtorıng agenttigi jedel-izdestirý sharalary barysynda Qaraǵandy qalasynda shyǵarylǵan jeri belgisiz 670 myńnan astam qorap temeki ónimderin tárkiledi. Jalpy somasy – 350 mıllıon teńgeden astam.

«Tergeý barysynda Ázerbaıjan azamaty basqa tulǵalarmen birlesip, Qaraǵandy oblysynyń aýmaǵynda «Kosmos», «Belomorkanal», «Troıka», «Stolıchnye» markaly temeki ónimderin aktsızdik markasyz satqany anyqtaldy.

Zańǵa qaıshy árekettiń saldarynan memleketke 149 mıllıon teńge kóleminde zalal keltirildi.

Tergeý jalǵasýda. Ózge aqparat tergeý múddesine oraı jarııa etilmeıdi», - dedi QR QMA baspasóz qyzmetinen.