Qaraǵandyda 30-shy jyldardaǵy asharshylyq qurbandaryna eskertkish ornatyldy
Ol ashtyqty beıneleıtin jabyq qazannyń beınesin quryp turǵan er men áıeldiń japsarlas fıgýralary túrinde jasalǵan, dep habarlaıdy QazAqparat tilshisi.
Eskertkishtiń ashylýyna qaıǵyly kezeń qurbandarynyń urpaqtary men oblys ákiminiń orynbasary Erbol Áliqulov qatysty.
Músinniń avtory – qazir Germanııada turatyn Jarmuhambet Tilegen. Sheber bul úshin tarıhı otanyna arnaıy kelip, munda alty aı turǵan.
«Ótken ǵasyrdyń 30-shy jyldaryndaǵy asharshylyq qurbandaryna eskertkish ornatý ıdeıasy Eýropanyń ár túkpirinde turatyn qazaqtarǵa tıesili. Germanııada bizdiń «Naýryz toby» atty qoǵamymyz bar. Bárimizdi ortaq tarıh, júrek syzdatar sezim biriktiredi. Sol jyldary úsh mıllıonnan astam qazaq qaıtys boldy, bizdiń ata-babalarymyz erekshe qaıǵyly kúnderdi basynan ótkerdi. Óskeleń urpaq bul tarıhı oqıǵa týraly bilýi úshin asharshylyq týraly eske salatyn eskertkish ornatýdy jón kórdik. Men birneshe eskızder jasadym, biz olardyń arasynan osyny tańdadyq. Eskertkishti jasaýǵa shamamen jarty jyl ýaqytymdy jumsadym», – deıdi músinshi Jarmuhambet Tilegen.
Músinshi ótken ǵasyrdaǵy qýǵyn-súrgin onyń da otbasyn aınalyp ótpegenin aıtady. Onyń ákesine ómir boıy basyn aman alyp qalyp, atý jazasyna ilikpeý úshin shetel kezip júrýge týra kelgen. Sondyqtan avtor ótken ǵasyr tarıhynyń qaıǵyly sátteri jaıly habardar.
«Men músinde sol kúnderdi eske alǵan kezdegi barlyq emotsııalardy jetkizýge tyrystym. Músin granıtten jasalǵan, tuǵyr da granıtpen qaptalǵan. Bıiktigi – 1,2 metr», – dedi avtor.
Eskertkishtiń orny kezdeısoq tańdalmaǵan. Kún saıyn meshitte duǵa baǵyshtalyp turady. Uıymdastyrýshylar meshit jamaǵaty ashtyqtan qaıtys bolǵan ata-babalarynyń jany úshin de duǵa etkenin qalaıdy.
«Eshqaısymyz máńgilik emespiz. Biz jastardy ótkenmen baılanystyratyn urpaqpyz. Biz bolmasaq olarǵa ótkenniń qaıǵyly oqıǵalary týraly kim aıtyp beredi? Al bul eskertkish bizdiń beıbit aspan men ómirimizdi baǵalaıtyn qaıǵyly kúnderdi eske salýy tıis», – dep atap ótti Eýropadan kelgen qazaq qaýymdastyǵynyń ókili Serik Tursyn.
Jınalǵandar qaza bolǵandardy bir mınýt únsizdikpen eske aldy.