Qaraǵandyda 25 otbasy baspanaly boldy

QARAǴANDY. QazAqparat – Búginde kezekte turǵandar men «Otbasy bankiniń» salymshylary qatarynan 25 otbasy ózderiniń baspanalaryna ıe boldy. Qaraǵandylyqtar B.Momyshuly kóshesindegi 26/3 úıde baspana aldy, dep habarlaıdy QazAqparat tilshisi.

Adamdar páterlerdi uzaq kútti. Bul úıdiń qurylysy 2013 jyly bastaldy, biraq merdiger uıymnyń bankrot dep tanylýyna baılanysty qurylys uzaqqa sozyldy. Sodan keıin jańa konkýrs jarııalanyp, jańa qurylys kompanııasy anyqtaldy. Bıyl 16 qabatty úı aıaqtaldy.

Ótken jyly birinshi blok-sektsııa aıaqtalyp, qonystandyrylǵan bolatyn. Endi mine, ekinshi kezek keldi.

Laýra Ihsanova páter buıyrǵan 25 baqytty jannyń qatarynda boldy. Turǵyn úı alý kezeginde áıel adam 2011 jyldan beri turǵan. 2017 jyly ol «Óńirlerdi damytý – 2020» baǵdarlamasyna qatysýǵa qujattar tapsyrdy.

«Árkimniń óz baspanasy bolýyn, qoljetimdi baspana boıynsha memlekettik baǵdarlamalardyń ýaqytynda oryndalýyn tileımin. Men óte baqyttymyn! Endi qyzym ekeýmiz eki bólmeli páterimizde turamyz. Úıdiń aýlasynda keshendi abattandyrý jumystary – balalar oıyn alańdary, turaq qaltalary, asfalttaý, jaryqtandyrý jáne t. b. josparlanǵan», – dep bólisti Laýra Ihsanova.

Búgingi kúni 96 páterdiń tek 25-i ǵana qoldanysqa berildi, al qalǵandary «Otbasy banki» jelisi boıynsha «Halyqtyń barlyq sanattaryna arnalǵan turǵyn úı» baǵyty boıynsha qujattardy qabyldaýdy bastady.

«Óńirlerdi damytý – 2020» baǵdarlamasy sheńberinde atalmysh mekenjaı boıynsha páter alýǵa kelesi sanattaǵy azamattar qatysa alady: Uly Otan soǵysynyń múgedekteri men qatysýshylaryna teńestirilgen adamdar; múgedek balalary bar nemese olardy tárbıeleýshi otbasylar; jasyna baılanysty zeınetkerler; jetim balalar jáne ata-anasynan aıyrylǵan, 29 jasqa tolmaǵan ata-anasynyń qamqorlyǵynsyz qalǵan balalar; qandastar; ekologııalyq zilzalalar, tabıǵı jáne tehnogendik sıpattaǵy tótenshe jaǵdaılar saldarynan turǵyn úıinen aıyrylǵan adamdar; kópbalaly jáne tolyq emes otbasylar, memlekettik qyzmetshiler jáne bıýdjettik uıymdardyń qyzmetkerleri.

Qujattardy qabyldaý merzimi – 2022 jylǵy 27-29 shilde aralyǵy.

Meken-jaıy: Qaraǵandy q., N. Nazarbaev dańǵyly, 39, OPEN KARAGANDA front-keńsńsi (qalalyq ákimdik ǵımaraty).

Jumys ýaqyty: 09:00-den 18:30-ǵa deıin (túski úzilis – 13.00-den 14.30-ǵa deıin).