Qaraǵandyda 10 turǵyn úı kesheniniń qurylysy toqtatyldy

QARAǴANDY. QazAqparat – Qaraǵandyda sot sheshimimen 10 turǵyn úı kesheniniń qurylysy toqtatyldy. Qurylys salýshylar ruqsat qujattarynsyz jumysqa kirisken. Jospardan tys tekserýdi Memlekettik sáýlet-qurylys baqylaýy basqarmasy júrgizdi, dep habarlaıdy QazAqparat tilshisi.

«Derekter bizge berilgen soń, 10 kompanııaǵa jospardan tys tekserý júrgizip, zań buzýshylyqtar týraly sotqa shaǵym túsirdik. Qurylys salýshylar QR ÁQBtK-niń 314-bab «Jobalyq qujattamasyz qurylys», 321-baby «Avtorlyq-tehnıkalyq qadaǵalaýsyz qurylys júrgizý» jáne 463-baby «MSQB talon-habarlamasysyz qurylys júrgizý» boıynsha ákimshilik jaýapkershilikke tartyldy. Barlyǵyna aıyppul salyndy», - dedi Memlekettik qurylys ınspektory Dýman Qasymjanov.

Eger eskertýler joıylmasa, nysan paıdalanýǵa jiberilmeıdi jáne ol qabyldaý aktisin almaıdy.

Ruqsatsyz qurylys salýshylar tizimine kelesi kompanııalar kirdi:

- «T-K Building» JShS («Al-Farabi» TK);

- «TT INVEST-2022» JShS («Han TK);

- «Satti Lux Stroy» JShS («Nura» TK);

- «Baiterek-2022» JShS («Amanat» TK);

- «SMK Group» JShS («Baiterek» TK);

- «Grıgorıan Sh.N.» JK (KT);

- «TBL building» JShS («Tole Bi 2» KT);

- «Revival Alliance» JShS (Erjanov k-si, 63/2);

- «KKK Beton» JShS («Baqytty otbasy» TK);

- «Optima-Stroy» JShS («Dınastııa» TK).

Ekonomıkalyq sotta qazir 3 turǵyn úı keshenin «óz erkimen salý» dep taný týraly talap-aryzdar bar. Bul – «Al-Farabi», «Han» jáne «Nura» turǵyn úı keshenderi.

Sondaı-aq, úleskerlerdiń qarajatyn zańsyz tartqany úshin 15 kompanııaǵa 320-bap boıynsha aıyppul salyndy. @gaskkrg Instagram áleýmettik jelisinde tolyq tizim keltirilgen. Qazir MSQB qaraýynda osyndaı zań buzýshylyqtar tirkelgen taǵy eki kompanııa bar.