Qaraǵandy: Jemqorlyqqa qarsy servıstik ortalyqta robot jumys isteıdi
Qazaqstan Respýblıkasy Sybaılas jemqorlyqqa qarsy is-qımyl agenttiginiń bastamasymen óńirlerde sybaılas jemqorlyqqa qarsy «Antikor ortalyǵy» ortalyqtary ashylýda. Bul jerde kez kelgen azamat óziniń máselesi boıynsha quqyqtyq kómek ala alady.
«Servıstik ortalyq Memleket basshysy jarııalaǵan «Halyq únine qulaq asatyn memleket» tujyrymdamasyn iske asyrý aıasynda azamattarǵa qolaıly jaǵdaı jasap, olarmen jedel ári tıimdi qarym-qatynas jasaýǵa arnalǵan dıalogtyq alańnyń rólin atqarady. Kezekti, tórtinshi jemqorlyqqa qarsy ortalyq búgin Qaraǵandy oblysynda agenttik tóraǵasy Alık Shpekbaevtyń jáne oblys ákimi Jeńis Qasymbektiń qatysýymen ashyldy» delingen habarlamada.
Servıstik ortalyqtyń kire berisinde qonaqtardy sońǵy úlgidegi sóıleıtin «Robot» qarsy alyp, ózi erkin júrip «Antikor ortalyǵy» qyzmetimen tanystyrdy.
Servıstik ortalyq tutynýshyǵa negizdelgen, uıymdastyrýshylyq mádenıeti joǵary Open-space jáne front-ofıs formatynda jumys atqarady.
Alık Shpekbaev atap ótkendeı, «Servıstik ortalyq - sybaılas jemqorlyqqa qarsy vedomstvanyń barynsha ashyqtyǵy men qoljetimdiligin qamtamasyz etetin azamattyq qoǵammen jáne buqaralyq aqparat quraldarymen ózara is-qımyl jasaýǵa arnalǵan biryńǵaı alań».
Qaraǵandynyń «Antikor ortalygy» eki qabattan boı kótergen: birinshi qabatta resepshn, operatsııalyq zal (kútýshilerge arnalǵan), keńes berýshilerdiń bólmeleri ornalasqan. Ekinshi qabatta press-ortalyǵy, jumys bólmeler jáne «Saryarqa – adaldyq alańy» jobalyq keńsesi mamandarynyń bólmeleri ornalasqan.
Ǵımaratta múmkindigi shekteýli azamattarǵa jaǵdaı jasalǵan, arnaıy kóteretin lıft bar.
Servıstik ortalyqta azamattyq qoǵam, sondaı-aq, quqyq qorǵaý jáne arnaıy organdarmen ótken kezdesýden keıin A.Shpekbaev azamattardy qabyldaý júrgizdi.