Qaraǵandy jastary Altyn orda eskertkishterin aralaıtyn ekspedıtsııaǵa attanady

QARAǴANDY. QazAqparat - Qaraǵandy oblysynda Jastar jyly aıasynda «Ulytaý – Altyn orda besigi» atty ǵylymı-tanymdyq ekspedıtsııa ótedi. Altyn ordanyń 750 jyldyǵyna arnalǵan joba «Rýhanı jańǵyrý» baǵdarlamasy boıynsha júzege asyrylýda. Ol sondaı-aq Elbasynyń «Uly dalanyń jeti qyry» maqalasynda qoıylǵan mindetterdi júzege asyrýǵa baǵyttalǵan, dep habarlaıdy QazAqparat Qaraǵandy oblysy ákimdiginiń saıtyna silteme jasap.

Ekspedıtsııanyń bastamashylary Qaraǵandy oblysynyń mádenıet, muraǵattar jáne qujattama basqarmasy men oblystyq tarıhı-ólketaný mýzeıi boldy.

Jeti kúndik týrda bir top jastar Altyn orda dáýirindegi eskertkishterdi aralap qaıtady. Ekspedıtsııa quramyna jas tarıhshylar, geograftar, ólketanýshylar, stýdentter, jýrnalıst-blogerler, sýretshiler kiredi.

Sapar barysynda beınetúsirilim júrgiziletin bolady. Bolashaqta Altyn Orda tarıhyna arnalǵan qysqa metrajdy fılm shyǵarý josparlanýda. Ekspedıtsııa qorytyndysy boıynsha fotoalbom, kartalar men býkletter shyǵarylady.

Baǵdarlamaǵa sáıkes, ekspedıtsııa baǵyty Han ordasy qalashyǵyna, Joshy han, Alasha han, Aıaqqamyr, Bolǵan Ana, Belen Ana, Qulan Ana kesenelerine jáne basqa da kıeli jerlerge barýdy qamtıdy. Sharaǵa qatysýshylar Altynshoqy shyńyna, Basqamyr jáne Aıaqqamyr taýlaryna kóterilip, Terekti áýlıe arheologııalyq keshenine barady.

Eske salaıyq, QR Prezıdenti Qasym-Jomart Toqaev «Ulytaý-2019» halyqaralyq týrıstik forýmynda bul aımaq álemdik deńgeıdegi etnografııalyq týrızmniń ortalyǵyna aınalýy tıis ekenin málimdegen bolatyn. Ol úshin qajetti jumystar Altyn ordanyń 750 jyldyǵyn merekeleý aıasynda bastalýy tıis, dep atap ótti Memleket basshysy.