Qaraǵandy turǵyny jalǵan qujat satyp alǵany úshin 80 saǵat qala kóshelerin sypyrady

QARAǴANDY. QazAqparat – Qaraǵandyda eńbekke jaramsyzdyq týraly jalǵan qujat satyp alǵan er adamnyń ótirigi shyǵyp, sot úkimimen 80 saǵattyq qoǵamdyq jumysqa tartyldy, dep habarlaıdy QazAqparat tilshisi.

Qala kásiporyndarynyń birinde 27 jastaǵy er adam otbasy jaǵdaıyna baılanysty úsh kún demalysqa shyǵýy kerek bolǵan.

Jigit kóp oılanbastan osy aralyqta «aýyryp qalýdy» sheshken.

Barlyǵy resmı bolýy úshin ol belgisiz adamdardan 4000 teńgege eńbekke jaramsyzdyq paraǵyn satyp alyp, kadr bólimine aparyp bergen.

Kásiporyn mamandary qyzmetkerdiń aýyrǵany týraly paraqtyń jalǵan ekenin anyqtap, bul jaıynda polıtsııaǵa habarlaǵan.

«Atalǵan fakti boıynsha qyzmetkerge qatysty QR QK 385-baby 3-bóligi boıynsha qylmystyq is tirkeldi, sot 80 saǵatqa qoǵamdyq jumysqa tartý túrinde jaza taǵaıyndady», - dep habarlady Qaraǵandy oblysy jáne Ulytaý oblysy boıynsha QAJD baspasóz qyzmeti.

Jaýapkershilikke tartylǵan er adam qazir jazasyn ótep jatyr. Sottalýshy ashyq-qyzǵylt keýdeshe kıip, qala kóshelerin sypyra bastady.