Qaraǵandy turǵyny HQKO qyzmetkeri qol kóterdi dep shaǵymdandy
Oqıǵa 20 qazanda Qaraǵandy qalasynyń Ońtústik-Shyǵys HQKO-synda bolǵan. 44 jastaǵy turǵyn ózi men onyń І toptaǵy múgedek anasyna Halyqqa qyzmet kórsetý ortalyǵynyń kúzetshisi shabýyl jasady dep polıtsııaǵa aryz jazǵan. Er adam barlyq oqıǵany vıdeoǵa túsirip alǵan.
Qaraǵandy oblysynyń polıtsııa departamenti habarlaǵandaı, turǵynnan aryz qabyldanyp, ol sot-medıtsınalyq saraptamadan ótýge jiberilgen.
«20 qyrkúıekte Qaraǵandy qalalyq PB Ońtústik-Shyǵys polıtsııa bólimine 44 jastaǵy er adam men 66 jastaǵy áıelden shaǵym kelip tústi. Olar HQKO ǵımaratynda bolǵan janjal barysynda jaraqat salǵan HQKO qyzmetkerine qatysty shara qoldanýdy surady. Bul faktiler polıtsııada tirkelgen. Ótinish berýshilerge sot-medıtsınalyq saraptamadan ótýge joldama berildi», - dep túsindirdi vedomstvonyń baspasóz qyzmeti.
«Azamattarǵa arnalǵan úkimet» memlekettik korporatsııasynda janjalǵa qatysty pikir bildirdi. Belgili bolǵandaı, er adam osy oqıǵadan bir kún buryn týysqanynyń qaıtys bolǵany týraly anyqtama alý úshin ortalyqqa kelgen. Alaıda, bul qujat 25 tamyzda daıyn bolyp, ony alyp ketýge eshkim kelmegendikten tıisti memlekettik organǵa qaıta jiberilgen. HQKO qyzmetkerleri qujatty kelesi kúni kelip alyp ketýin suraǵan. Birinshi kúni er adam Ashyq mártebesin rastaýdan bas tartqanyn aıta ketý kerek. Ekinshi ret jaǵdaı taǵy da qaıtalanyp, kelýshi óziniń mártebesin rastaǵysy kelmegen.
«Klıent daýys kóterdi, bylapyt sóıledi, HQKO qyzmetkerlerin qasaqana arandatyp, oqıǵany smartfon kamerasyna túsirdi. 20 qazanda ortalyqqa qaıta kelgende klıent taǵy da Ashyq qosymshasy arqyly tekserýden ótýden bas tartty. Ol óziniń agressıvti ustap, qyzmetkerimizge til tıgizdi, saldarynan janjal týyndady. Qazirgi ýaqytta tekserý júrip jatyr», - dep habarlady «Azamattarǵa arnalǵan úkimet» memlekettik korporatsııasynan.