Qaraǵandy, Shymkent qoımalarynan suranysqa ıe dári-dármek túrleri tabyldy
15:45, 17 Shilde 2020
NUR-SULTAN. QazAqparat - Qaraǵandy, Shymkent qoımalarynan suranysqa ıe dári-dármek tabyldy. Bul týraly QR Sybaılas jemqorlyqqa qarsy is-qımyl agenttigi parasat departamentiniń dırektory Ǵanıjan Asanuly aıtty, dep habarlaıdy QazAqparat tilshisi.
«Jeke jetkizýshilerdiń qoımalarynda suranysqa ıe dári-dármektiń úlken kólemde bolý faktileri anyqtaldy. Bul - dári-dármektiń jasandy jetispeýshiligine jol ashyp otyr. Máselen, Qaraǵandy oblysynda qoımalarda satylmaǵan paratsetamol, aspırın dárileriniń 600 myń qaptamasy anyqtaldy. Monıtorıng qorytyndysymen olar jedel dárihanalarǵa jetkizildi», - dedi ol agenttiktiń baspasóz qyzmeti alańynda ótken brıfıng barysynda.
Sonymen qatar onyń dereginshe, Shymkentte jeke jetkizýshilerdiń qoımalarynda eýfılın, analgın, paratsetamol, tsefozalın syndy suranysqa ıe preparattar anyqtalǵan.
Olar bir apta boıy sertıfıkaty bolmaǵandyqtan qoımada jatyp qalǵan.