Qaraǵandy polıtsııasynda tálimgerlik ınstıtýty jandandy

QARAǴANDY. QazAqparat - Qaraǵandy oblystyq ishki ister departamentinde Temirtaý qalasyndaǵy ІІM oqý ortalyǵynda alǵashqy daıarlaýdan ótken 18 jas ofıtserdi taǵaıyndaý jóninde buıryqqa qol qoıyldy, dep habarlaıdy QazAqparat tilshisi.

Jańadan shaqyrylǵan ofıtserler oblystyń Іshki ister departamentinde tálimgerlerimen kezdesti. Osyǵan oraı, polıtsııada tálimgerlik ınstıtýty qaıta jandandy. Jyl boıy jas qyzmetkerler aǵa áriptesteriniń qamqorlyǵynda jumys jasaıtyn bolady. 

Prezıdent elde tártip ornatýdy jáne zańnyń saqtalýyn saıasattyń basty mindeti retinde qarastyrady. Elbasy óz sózinde memleket tirshiliginiń kez kelgen salasynda zań ústemdik etken jaǵdaıda jáne adam quqyǵy qorǵalǵanda ǵana azamattardyń bılikke, onyń ishinde ishki ister organdaryna degen senimi artatynyn jıi aıtady. 

«Elde sáıkes quqyqtyq tártip ornatýǵa kásibı daıarlyǵy joǵary, sol tártip pen moraldyq qaǵıdalardy qatań saqtanatyn adamdar ǵana qabiletti», - dedi oblystyq ІІD basshysynyń orynbasary Ardaq Yntyqbaev jas qyzmetkerlerge.

Aıta ketý kerek, jańa qyzmetkerler qaraǵandylyq polıtsııanyń ártúrli salalarynda jumys jasaıtyn bolady. Olar ýchaskelik ınspektorlardan tergeýshige deıin qyzmet atqara alady.