Qaraǵandy polıtseıleri jyl basynan beri 200-den astam ınternet-alaıaqtyqty anyqtady
Brıfıngte Qaraǵandy oblysynyń polıtsııa departamenti bastyǵynyń orynbasary Ábil Ábildın 2021 jyly ınternet-alaıaqtardyń tórt turaqty tobynyń ustalǵanyn habarlady.
«Aǵymdaǵy jyldyń tek eki aıynda ǵana bizdiń óńirdiń 516 azamaty ınternet-alaıaqtyq týraly ótinish jazdy. Qazirgi ýaqytta jedel jáne tergeý is-sharalarynyń nátıjeleri boıynsha ınternet- alaıaqtardyń tórt turaqty toby ustaldy. On jeti alaıaq qamaýǵa alynyp, ýaqytsha ustaý ızolıatoryna jiberildi, olarǵa ınternettegi alaıaqtyqtyń 200-den astam jaǵdaıy boıynsha aıyp taǵyldy», - dedi ol.
Sondaı-aq, Qaraǵandy qalasynyń polıtsııa basqarmasy bastyǵynyń orynbasary Shahnazar Salın ınternet-alaıaqtyqtyń tanymal tásilderi týraly jetkizdi.
«Qaraǵandy oblys ortalyǵy bolyp tabylady jáne qylmystyq quqyq buzýshylyqtardyń iske
asyrylý derekteriniń basym bóligi qalaǵa tıesili. Bir táýlik ishinde biz quqyq buzýshylyqtyń osy túriniń 7-den 12-ge deıingi faktisin tirkeı alamyz. Alaıda, Qaraǵandy boıynsha osyndaı ıntsıdentterdiń aldyn alýǵa baǵyttalǵan birqatar is- sharalar turaqty túrde júrgiziledi. Birinshi kezekte - azamattardy eskertý. Búgingi tańda biz bul máseleni BAQ-ta únemi jarııalap otyramyz jáne ınternet-alaıaqtardyń is-áreketteriniń mysaldaryn kórsetetin beınerolıkter túsiremiz. Negizinen alaıaqtar jumys isteıtin alty baǵyt bar. Olar: ınternette taýarlar úshin aldyn ala tólem nemese tolyq tólem alý, shaǵyn nesıe uıymdarynyń saıttary arqyly azamattarǵa onlaın-nesıe resimdeý. Bank qyzmetkerleri retinde turǵyndardy aldaý, jıhaz, plastık terezeler jasaý, páterlerdi jalǵa berý úshin aldyn ala tólem nemese tolyq tólem alý; túrli jobalarǵa aqsha qarajatyn «tıimdi» salý, kartalardyń, shottardyń derbes derekterin ıelený jáne keıinnen aqsha qarajatyn urlaý», dep málim etti Sh. Salın.
Polıtsııa departamenti ókilderiniń aıtýynsha, azamattar eshkimge tólem kartalarynyń nemese shottardyń málimetterin usynbaýy tıis. Bul derekterdi olardan suraýǵa nemese talap etýge eshkimniń quqyǵy joq. Muny bank qyzmetkerleri de, quqyq qorǵaý organdarynyń qyzmetkerleri de jasaı almaıdy. Sondaı-aq, spıker eger azamattar ınternet-alaıaqtyqqa tap bolsa, qalaı áreket etý kerektigi týraly da aıtty.
«Eger siz nemese sizdiń týystaryńyz alaıaqtarǵa tap bolsa, onda dereý banktiń jedel jelisine
qońyraý shalyp, sizdiń shotyńyzda qandaı da bir bereshek bar ma nemese qandaı da bir zańsyz
operatsııalar júrgizilip jatqanyn bilýińiz kerek. Ári qaraı, siz birden 102 nómirine qońyraý
shalyp, bolǵan jaǵdaı týraly habarlaýyńyz qajet. Alaıaqqa tán belgi – adamǵa psıhologııalyq qysym jasaý, olar eshqashan qońyraýdy úzbeıdi. Ózińizdi osyndaı oqıǵalardan qorǵaý úshin qońyraýdy qaıta shalý kerek nemese qońyraý shalýshyǵa qazir banktiń senim telefonyna qaıta qońyraý shalǵanyńyzdy aıtý kerek. Eger adam qarsy tura bastasa, onda bul - alaıaq. Bank qyzmetkeri eshqashan óz paıdalanýshysyna qońyraý shalmaıdy jáne mundaı operatsııalar týraly sóılespeıdi», - dedi Qaraǵandy oblysy polıtsııa departamenti bastyǵynyń orynbasary Ábil Ábildın.