Qaraǵandy polıtseıleri janyp jatqan úıden gaz ballonyn alyp shyqty
15 aqpan túngi saǵat 22:40 shamasynda Qaraǵandy oblysy Abaı aýdandyq polıtsııa basqarmasynyń patrýldik polıtsııa vzvodynyń qyzmetkerleri Azamat Tastenuly men Meıirjan Dıýsekenov Abaı qalasyndaǵy Promyshlennyı kóshesinde jer úıden shyqqan qoıý tútindi kórgen.
Polıtsııa qyzmetkerleri Kalının kóshesiniń qıylysymen birden sol jaqqa bet alyp, tútin shyqqan úıge barǵan.
– Birden ot shyqqan úıge bardyq. Toqtaı bergenimizde bizdiń qyzmettik kóliktiń aldynan qolynda kishkentaı balasy jáne janynda jasóspirim qyzy bar áıel júgirip shyǵyp, «úıimizden órt shyqty, kómektesińizder» dep aıqaılady. Sondaı-aq azamatsha gaz ballony baryn aıtty. Áıeldi balalarymen birge kólikke otyrǵyzdyq. Men birden kezekshi bólimge habarlasyp, órt sóndirýshilerdi shaqyrdym, – deıdi tótenshe jaǵdaıǵa birinshi bolyp jetken Meıirjan Dıýsekenov.
Osy ýaqytta Meıirjannyń áriptesi Azamat Tastenuly janyp jatqan úıge qaraı júgirgen.
– Úıge jaqyndaǵanymda mańynda órt sónidirip júrgen azamattar boldy. Olardan úıde gaz ballony bar-joǵyn suradym. Sóıtsek, órt shyqqanda úıdegiler syrtqa shyqqanda ballondy shyǵarýǵa umytyp ketken. Úıdiń kire berisi túgel otqa oranǵandyqtan ol jerden ishke kirý múmkin bolmady. Bir kezde sol mańda júrgen bir azamat úıdiń art jaǵynan maǵan gaz ballony turǵan jerdi kórsetti. Ol jerge tereze arqyly kirdim. Ol kezde úıdiń tóbesi janyp, ishi tútinge tolyp ketken edi. Qolymdaǵy qolshamdy jaǵyp, gaz ballony turǵan jerdi taýyp aldym. Jalǵanǵan qubyrshegin kesip, ballondy dalaǵa alyp shyqtym, – deıdi Azamat Tastenuly.
Araǵa birneshe mınýt salyp, órt sóndirýshiler kelip, úıdegi qyzyl jalyndy óshirgen.
Úı ıesi Elena Abenova tilsiz jaý shyqqanda alǵash bolyp kómekke kelgen tártip saqshylaryna alǵysyn bildirdi.
– Birinshi bolyp kelip, qol ushyn bergen tártip saqshylaryna alǵysym sheksiz. Órt bastalǵan kezde úlkendermen qosa 13 jastaǵy qyzymmen 8 aılyq nemerem bolǵan. Polıtsııa qyzmetkerleriniń der kezinde jasaǵan áreketteriniń arqasynda qazir olar ózderin jaqsy sezinedi. Bul jigitter naǵyz batyrlar. Biri óz ómirin qaterge tigip, úıdegi gaz ballonyn alyp shyqty. Eger úıde gaz jarylǵanda sońy aýyr bolar edi, – deıdi Elena Abenova.
Vıdeodan alynǵan kadr