Qaraǵandy oblysynyń turǵyny jaraly aqqýdy qutqardy

QARAǴANDY. QazAqparat – Qaraǵandy oblysy Buqar jyraý aýdany Aqbel aýylynyń turǵyny Dáýken Taıǵojın jaralanǵan aqqýdy qutqardy. Qanaty synýyna baılanysty bul qus Qorǵankól kólinde qatyp qala jazdaǵan, dep habarlaıdy QazAqapart tilshisi.

Aqbel aýylynyń turǵyndary sý aıdynyndaǵy aqqýdy eki apta buryn baıqaǵan. Ol ushýǵa tyrysqanymen onysynan eshteńe shyqpady.

«Biz kólde júzip júrgen aqqýdy kórdik, biraq jaqyndaı almadyq: ol bizden úrkidi. Al muz áli sonshalyqty qatpaǵan edi. Alaıda birer kún buryn qustyń ózi jaǵaǵa shyǵyp, tipti aýylǵa jaqyndady. Biz onyń kómekke muqtaj ekenin túsindik. Ony meniń baqshama aıdap, taýyqtarym turatyn saraıǵa ornalastyrdym. Qazir aqqý bizge úırenip keledi, shıraı bastady. Jemdi jaqsy jeıdi, sý ishedi. Biraq ol endi usha almaıtyn tárizdi», – deıdi Dáýken.

Aqqýdy kórýge Dáýkenniń aýlasyna aýyl balalary ǵana emes, eresekter de keledi eken. Ol qustyń aýyldyń naǵyz juldyzyna aınalǵanyn atap ótti.

«Jubaıym qaljyndap, aqqýdy Juldyz dep ataý kerek deıdi. Biz oǵan úırenip qaldyq. Oǵan qamqorlyq jasaýǵa, ýaqytyly jem, sý berýge daıynbyz. Bul óte ádemi qus. Bala kezimizden bizge aqqýlardyń kıeli kus ekenin aıtyp, olardy qorǵaý kerek dep úıretti», – deıdi aýyl turǵyny.

Aqbel aýyldyq okrýginiń ákimdigi aqqý týraly aqparatty oblystyq orman sharýashylyǵy jáne janýarlar dúnıesi aýmaqtyq ınspektsııasyna bergenin habarlady.

Jaqyn arada ol jańa mekenge kóshirilýi múmkin.