Qaraǵandy oblysynyń turǵyndary senatormen kezdesip, pikir almasty

QARAǴANDY. QazAqparat – Parlament Senatynyń depýtaty Serik Óteshov Nura aýdanynda boldy jáne jergilikti turǵyndarmen, aýdannyń qoǵamdyq keńesiniń múshelerimen, aýdandyq máslıhat depýtattarymen, aýyl sharýashylyǵy ónimderiniń iri óndirýshilerimen jáne basqarma basshylarymen kezdesti, dep habarlaıdy QazAqparat Palatanyń baspasóz qyzmetine silteme jasap.

Kezdesýde jergilikti aýyl sharýashylyǵy óndirýshilerin qoldaý jáne aýdanda gaz qubyryn tartý máseleleri talqylady. Sondaı-aq, depýtat Nura kentindegi sport ǵımarattarynyń jumysymen tanysty.

Serik Óteshov Shahterskoe aýylynda da boldy. Ol jergilikti qoǵamdastyq ókilderimen kezdesti jáne aýyl turǵyndaryna Parlamenttiń joǵarǵy palatasynyń zań shyǵarý qyzmeti týraly egjeı-tegjeıli aıtyp berdi.

«Senatorlar úsh aı ishinde Memleket basshysynyń bastamasy boıynsha qolǵa alynǵan reformalardy zańnamalyq turǵydan qamtamasyz etý jóninde aýqymdy jumys atqardy. Parlament osy kezeńde 25 zań qabyldady, onyń 10-y depýtattardyń bastamasy boıynsha ázirlengen bolatyn. Depýtattardyń bastamasymen ázirlengen zańdar azamattardyń ál-aýqatyn arttyrýǵa, olardy áleýmettik qorǵaýǵa jáne elimizdiń ekonomıkalyq damýyna baǵyttalǵan», - dep atap ótti Serik Óteshov.

Kezdesýge qatysýshylar aýdan turǵyndarynyń ómirin jaqsartýǵa, jergilikti aýyl sharýashylyǵy óndirýshilerin qoldaýǵa, mańyzdy áleýmettik jáne ınfraqurylymdyq jobalardy iske asyrýǵa jáne jergilikti ózin-ózi basqarýdy damytýǵa baılanysty birqatar ózekti máseleni talqylady.

Senator Serik Óteshov kezdesý sońynda qatysýshylarǵa belsendi azamattyq ustanymdary úshin alǵysyn bildirdi jáne barlyq ótinishter men usynystardy muqııat qarap, zerdelenetini týraly aıtty.