Qaraǵandy oblysynyń tasjoldarynda 18 jyljymaly blokbeket qoıyldy
Qaraǵandy oblysy aýmaǵynan ótetin respýblıkalyq mańyzy bar jáne oblystyq tasjoldarǵa mal urlyǵynyń aldyn alýǵa baılanysty 18 jyljymaly blokbeket qoıyldy.
Onyń quramyna krımınaldyq polıtsııa, ýchaskelik polıtsııa ınspektorlarymen patrýldik polıtsııa qyzmetkerleri jumyldyryldy.
– Ózderińizge belgili qazirgi ýaqytta dástúr boıynsha kúzdik jáne soǵym ýaqyty jaqyndap keledi. Bul kezde barymtashylardyń da halyqtyń malyna tynyshtyq bermeıtini anyq. Solardyń kesirinen tórt túligin baptap otyrǵan sharýa qojalyq ıeleri japa shegedi. Naqty mysal keltire keteıin, ótken aptada ǵana osy tasjolda patrýldik polıtsııa batalonynyń qyzmetkerleri eshqandaı qujatsyz 6 jylqy ákele jatqan avtokólik toqtatty. Teksere kelgende jylqylardyń jaıylymnan urlanǵany anyqtaldy. Qazirgi ýaqytta kúdikti ustalyp, ol tergelip jatyr», – dedi Qaraǵandy oblystyq Polıtsııa departamenti bastyǵynyń orynbasary Ábil Ábildın.
Á.Ábildın «Qarqaraly-Qaraǵandy» tasjolyndaǵy blokbeketke túsken qyzmetkerlerge nusqama ótkizip, polıtsııa qyzmetkerleriniń aldyna et ónimderin tasymaldap kele jatqan avtokólikterdi tekserý barysynda ónimderge qujattardyń bolýyn, maldyń urlanǵan ne bolmasa óz maldary ekenin anyqtaý boıynsha mindetter júktedi.
Aıta ketý kerek, oblys aýmaǵynda jyl basynan bastap mal urlyǵyna baılanysty 47 derek tirkeldi. Keshendi is-sharalardyń barysynda polıtsııa qyzmekterleri 22 qylmysty ashty. Sondaı-aq, turaqty túrde mal urlyǵymen aınalysqan eki qylmystyq top ustaldy. Olardyń 14 qylmysqa qatystylyǵy anyqtalyp, qazirgi ýaqytta is sotqa jiberildi. Qaraǵandy oblysynyń Polıtsııa departamenti turǵyndardan polıtsııa qyzmetkerleri ótkizip jatqan is-sharalarǵa túsinistikpen qaraýdy suraıdy.
Foto: polisia.kz