Qaraǵandy oblysynyń shalǵaı aýyldarynyń turǵyndaryna medıtsınalyq kómek kórsetildi

QARAǴANDY. QazAqparat – «Salamatty Qazaqstan» medıtsınalyq poıyzy Qaraǵandy oblysynyń Nura aýdanynda boldy. Shubarkól kenti men Barshyn, Tikenekti, Taldysaı, Sonaly, Janbóbek jáne Qulanótpes aýyldarynyń turǵyndary tegin medıtsınalyq kómek aldy, dep habarlaıdy QazAqparat tilshisi.

Olar jalpy tájirıbe dárigeri, stomatolog, oftalmolog, LOR-dáriger, hırýrg, ýrolog, nevropatolog jáne basqa da bilikti mamandardyń tekserýinen ótti.

Poıyz zamanaýı dıagnostıkalyq jáne emdik jabdyqtarmen, ýltradybystyq apparatýramen, flıýorografııamen, zerthanamen, ınternetke symsyz qosylýǵa arnalǵan baılanys quraldarymen jabdyqtalǵan.

«Bizdiń tórt balamyz bar. Otbasymyzben túgeldeı densaýlyq poıyzyna bardyq. Balalardy tis dárigeri jáne hırýrgke, LOR-dárigerge kórsettik. Mamandar saýatty, bárin túsindirdi. Mundaı poıyzdyń bizge jyl saıyn kelýi óte mańyzdy. Aýdan ortalyǵy bizden 400 km qashyqtyqta», – deıdi Shubarkól kentiniń turǵyny Janna Meıramova.

«Men tek bir dárigerdiń qaraýynan ótýdi josparlaǵan edim, biraq barlyq mamandardan óttim. Bul óte yńǵaıly. Eki kúnniń ishinde aýdannyń kóptegen turǵyndary medıtsınalyq kómek, taǵaıyndaýlar men dári-dármekterge retsept ala aldy. Kóbi óz balalaryn kórsetti, mektep aldynda medıtsınalyq tekserýden ótti», – dep bólisti Shubarkól kentiliń taǵy bir turǵyny Baıan Ótebaeva.

«Salamatty Qazaqstan» – «Medıtsınalyq poıyzdar» qaıyrymdylyq jobasynyń bir bóligi. Jobanyń basty maqsaty sapaly medıtsınalyq qyzmet kórsetýge qol jetkize almaıtyn shalǵaıdaǵy eldi mekenderdiń turǵyndaryn tegin medıtsınalyq tekserý jáne dıagnostıkalaý bolyp tabylady.