Qaraǵandy oblysynyń pedagogteri páter kiltterin aldy

QARAǴANDY. QazAqparat – Muǵalimder kúni qarsańynda tórt pedagog Qarǵandy oblysynyń Saran qalasy men Aqtas kentinen jalǵa beriletin páterlerdiń kiltterin aldy, dep habarlaıdy QazAqparat tilshisi.

«Muǵalimder kúnin merekeleý qarsańynda jalǵa beriletin páterlerdi Qaraǵandy oblysynyń tórt oqytýshysy aldy. Páterler Saran men Aqtasta ornalasqan. Turǵyn úı alǵandardyń arasynda jas mamandar men suranysqa ıe muǵalimder bar», – dep jazdy bilim basqarmasynyń basshysy Gúlsim Qojahmetova Facebook- paraqshasynda.

Qyzmettik páter alǵan Perýza Jaıyqbaeva tarıh pániniń muǵalimi, «Bilim-ınnovatsııa № 2» lıtseıinde eńbek etedi. Eńbek ótili – 18 jyl.

«Qyzylorda týmasymyn. Qaraǵandyǵa 2007 jyly kóship keldim. Uzaq jyldar boıy balalarymmen birge úı jaldadym. Moıyndaý kerek, qıyn boldy. Men olardy jalǵyz asyryp otyrmyn. Jalǵa berýshiler ártúrli boldy, jıi tólemderin ósirip jiberip otyrdy. Keıde eskertpesten turyp jatqan úıimizdi satyp jiberip, bizdi qýyp shyǵarǵan kezder de boldy. Maǵan qyzmettik páter berilgenine qýanyshtymyn. Endi tek kommýnaldyq qyzmetter úshin tóleımin. Bul muǵalimderge jaqsy kómek», – deıdi Perýza Jaıyqbaeva.

Qyzmettik páterlerge úmitkerler turǵyn úı komıssııasynyń otyrysynda iriktelgen. Qaraýǵa barlyǵy jeti ótinish shyǵaryldy, olardyń tórteýi maquldandy. Muǵalimdermen jaldaý sharttary jasaldy.

Qaraǵandy oblysy bilim basqarmasynyń menshiginde Saran jáne Aqtas qalalarynda barlyǵy 24 páter bar. Búgingi tańda olardyń barlyǵynda otbasylar qonystanǵan.