Qaraǵandy oblysynyń Nura aýdanynda bıyl 11 myń sharshy metr turǵyn úı salynbaq

QARAǴANDY. QazAqparat – Qaraǵandy oblysynyń ákimi Jeńis Qasymbektiń tóraǵalyǵymen ótken onlaın keńeste Nura aýdanynyń 2021 jyly damýy týraly aıtyldy. Aýyldaǵy ómirdi jaqsartý úshin memlekettik baǵdarlamalardyń tıimdiligi atap ótildi.

Ótken jyly Nura aýdanynda Jumyspen qamtýdyń jol kartasy boıynsha 17 joba júzege asyryldy. Bul áleýmettik jáne ınjenerlik ınfraqurylymdy jaqsartýǵa múmkindik berdi. Aýyldarda jaqsy joldar kóbeıip, sý qubyry jelisi retke keltirilýde. Nura aýdanynda basseın qurylysy bastaldy, nysan bıyl paıdalanýǵa berilýi tıis. Barshyn aýylynda «Aýyl – el besigi» arnaıy jobasynyń arqasynda jergilikti aýrýhanada jylý máselesi sheshildi - qazandyq kúrdeli jóndeýden ótti.

«Biraz jumys júrgizildi. Aýdan turǵyndary muny baǵalaıdy dep oılaımyn. Bıyl «Aýyl – el besigi» boıynsha birqatar joba josparlanǵan. Ótken jyly «Nurly jer» baǵdarlamasy boıynsha turǵyn úı qurylysy ulǵaıdy. Odan da kóp qurylys salý qajet», - dedi oblys ákimi Jeńis Qasymbek.

2021 jylǵa arnalǵan josparlar týraly aýdan ákimi Aıan Shalmaǵanbetov málimdedi.

«Aýyl - el besigi» boıynsha Kertindi aýylyndaǵy feldsherlik-akýsherlik pýnkt qurylysy qarjylandyryldy. Muzbel aýylynda mektep pen joldar jóndeledi.

Bıyl oblystyq bıýdjet esebinen Nura - Shahterskoe - Prjevalskoe avtojolyn qaıta jańartý josparlanǵan.

«2020 jyly Nura kenti men Aqmeshit aýylyndaǵy sý qubyry jelisin qaıta qalypqa keltirý aıaqtaldy. Bıyl Janbóbek aýylyndaǵy sý qubyry jelisin qaıta jańartýǵa qarajat bólindi», - dep habarlady aýdan basshysy.

Onyń aıtýynsha, turǵyn úı qurylysy 6,7% ósimmen 11,2 myń sharshy metr kóleminde josparlanǵan. «Nurly jer» baǵdarlamasy boıynsha aýdan ortalyǵynda jalǵa beriletin turǵyn úı berý úshin 20 eki páterli úı tapsyrylýy tıis.

Bılik sportpen aınalysýǵa jaǵdaı jasaýǵa da kóńil bóledi. Bıyl Nura men Ahmet aýylynda hokkeı men fýtbol oınaýǵa arnalǵan korttar ashý kózdelip otyr. Aýdan ortalyǵynda basketbol alańy men tartan tóselgen júgirý joly salynady.