Qaraǵandy oblysynyń metallýrgteri elordaǵa «Nur-Sultan» ataýyn berýdi qoldady
«Qaraǵandy oblysynyń metallýrgteri Sizdiń Prezıdenttik ókilettigińizdi toqtatý týraly sheshimińizdi úlken muńmen qabyldadyq. Bizge osy sheshimińiz ońaı soqpady. Sebebi bizdiń ataqty metallýrgııalyq kombınattyń barsha tarıhy, sondaı-aq Temirtaý qalasynyń tarıhy tikeleı Sizben baılanysty. Siz sekildi metallýrgterdi basqa eshkim túsine almaıdy. Álemdik deńgeıdegi Kóshbasshy jolyńyzdy bizdiń kombınattan bastaǵanyńyz bizdiń esimizde. Osynda Siz domna peshiniń aldynda turyp, eńbek ettińiz. Osy jerde Sizdiń jastyq shaǵyńyz ótti», - delingen metallýrgter hatynda.
Osy oraıda qaraǵandylyqtar Elbasy álemdik deńgeıdegi saıasat qaıratkeri atanǵan kezde de Temirtaýdy qoldaýǵa ýaqyt pen múmkindik tapqanyn atap ótti.
«Ótken jyly da bizge qoldaý jasadyńyz. Bizdiń otbasymyz úshin óte mańyzdy máselege sheshim qabyldadyńyz. Sizdiń tapsyrmańyz boıynsha osy jerdegi JEO jańǵyrtylyp jatyr, birqatar áleýmettik nysannyń qurylysy júrgizilýde. Osy oraıda sheksiz alǵysymyzdy aıtamyz», - deıdi metallýrgter ujymy.
Sonymen qatar olar Elbasynyń prezıdenttik ókilettigin toqtatý sheshimi tosyn jaǵdaı bolǵanyn aıtýda.
«Bizdiń kombınatqa, qalamyzǵa, elimizge, sondaı-aq barsha álem úshin jasaǵan eńbegińiz úshin Sizge rızashylyǵymyzdy bildiremiz. Metallýrgter árqashan da Sizben birge ekenin bilip júrińiz! Biz barshamyz bir adamdaı elordaǵa «Nur-Sultan» ataýyn berý bastamasyn qoldadyq», - dep jazdy Qaraǵandy oblysynyń metallýrgteri.