Qaraǵandy oblysynyń metsenattary «Rýhanı jańǵyrý» jobalaryna 5 mlrd teńge bóldi

ASTANA. QazAqparat - Qaraǵandy oblysynyń metsenattary «Rýhanı jańǵyrý» baǵdarlamasynyń jobalaryna 5 mlrd teńge bóldi. Bul týraly «Rýhanı jańǵyrý» baǵdarlamasyn Qaraǵandy oblysynda iske asyrýdyń birinshi jylyn qorytyndylaǵan óńir basshysy Erlan Qoshanov málim etti, dep habarlaıdy QazAqparat tilshisi.

Oblys ákiminiń aıtýynsha, jarty jyl buryn ulttyq deńgeıdegi mundaı aýqymdy jobanyń mánin kóbi túsine bermegen. Alaıda búgingi tańda baǵdarlama kóptiń den qoıar nazaryna, bastamasyna aınalyp otyr. Qaraǵandy oblysynda baǵdarlamada bekitilgen barlyq alty arnaıy joba boıynsha belsendi jumys júrgizilip jatyr.

«Baǵdarlama sheńberinde Qaraǵandy oblysynda Azamattyq bastamalar kúni uıymdastyryldy. Ol óńirimizdiń kez kelgen turǵynyna ómirdiń sol nemese basqa salasyn qalaı jaqsartýǵa bolatyny týraly naqty usynystarmen kelýge múmkindik beredi. Bul aktsııa qaraǵandylyqtardyń úlken qyzyǵýshylyǵyna ıe bolǵanyn aıta ketken jón. Oǵan qosa, taǵy bir qyzyqty joba - «Igi ister korporatsııasy» mobıldik qosymshasy. Onyń kómegimen kez kelgen adam qalaýy boıynsha telefonnan naqty qaıyrymdylyq jobalaryna azdaǵan soma jibere alady», - deıdi Erlan Qoshanov.

Onyń aıtýynsha, qaraǵandylyqtar ásirese «Týǵan jer» baǵdarlamasyna erekshe den qoıǵan.

«Árıne, «Týǵan jer» kimge de bolsa qasıetti, qasterli. Sondyqtan, týǵan jerin damytýǵa úles qosý - árbir azamattyń paryzy dep bilemin. Bizdiń halqymyzda «Týǵan jerge týyń tik» degen sóz bar. Bizdiń óńirdiń belgili kásipkerleri men metsenattary týǵan jerin damytýǵa úlken qoldaýyn kórsetip kele jatyr. Solardyń arqasynda 78 nysan salynyp, jóndeýden ótkizildi», - deıdi oblys ákimi.

Osylaısha, óńirde ártúrli baǵytta 456 joba jasalǵan. Olardyń jartysy osy ýaqytqa deıin iske asyrylyp qoıǵan. Málimdelgen jobalardyń jalpy quny 13 mlrd teńgeden asyp ketken. Onyń ishinde 5 mlrd teńge somany demeýshiler men metsenattar qosyp otyr.