Qaraǵandy oblysynyń qutqarýshylaryna jańa tehnıkanyń kiltteri tabystaldy
Qutqarýshylarǵa jańa tehnıka men avtomobılderdiń kiltterin Qaraǵandy oblysy ákiminiń birinshi orynbasary Vadım Basın tabys etti.
«Sizderdiń qyzmetterińiz qanshalyqty kúrdeli jáne qaýipti ekenin bárimiz bilemiz. Atqaryp jatqan jumystaryńyz óte mańyzdy jáne qoǵamda qurmetke laıyq. Bıyl departamentke jergilikti bıýdjetten 9 mln teńge bólindi, bul bólimshelerdi 86,6 % tehnıkamen jabdyqtaýǵa múmkindik berdi. Bul qazirdiń ózinde jaqsy nátıje. Biraq biz munymen toqtamaımyz. Aldaǵy jyldary jabdyqqa degen qajettilikti tolyǵymen jabý úshin 840 mln teńge bólýdi josparlap otyrmyz», – dedi Vadım Basın.
2015 jyldan beri Qaraǵandy oblysy TJD quziretine barlyǵy 163 avarııalyq-qutqarý, ınjenerlik jáne jedel-qyzmettik tehnıka tústi.
«Jańa avtomobılder men tehnıkalardy – tabıǵı órtterdi sóndirýge arnalǵan bes tonnalyq 8 avtotsısterna jáne 10 borttyq tirkemeni – biz aýdandarǵa taratamyz. Sonymen qatar bıyl anyqtaý qyzmetteri úshin kompıýterlik jáne uıymdastyrý tehnıkasy satyp alyndy. Jergilikti jáne respýblıkalyq bıýdjetterden órt sóndirýshilerge arnalǵan 818 jaýyngerlik kıim jıyntyǵy satyp alyndy», – deıdi Qaraǵandy oblysy TJD bastyǵy Murat Qatpanov.
Qarqaraly qalasynyń № 16 órt sóndirý bólimi uzaq ýaqyt boıy tehnıkaǵa muqtaj boldy. Qazir uıymnyń balansynda tórt ZIL men bir KamAZ bar.
«Bul avtotehnıkany asyǵa kúttik. Búgin KamAZ bazasynda qurastyrylǵan órt tsısternasyn aldyq. Bizdiń qaramaǵymyzda Qarqaraly ulttyq qoryǵy bar, onyń aýmaǵy úlken. Sondaı-aq 24 aýyldyq okrýgke qyzmet kórsetemiz. Bizdiń bólimsheden basqa № 27 tarmaq bar. Shtat boıynsha bizde 23 adam bar», – dedi № 16 órt sóndirý bóliminiń bastyǵy Almas Ibraev.