Qaraǵandy oblysynyń iri kásiporyndary jergilikti taýarlardy satyp alýdy ulǵaıtady

QARAǴANDY. QazAqparat – Qaraǵandy oblysynda júıe quraýshy kásiporyndardyń satyp alýlarynda jergilikti qamtýdy ulǵaıtý basym másele bolyp tabylady, dep habarlaıdy QazAqparat tilshisi.

Oblys ákimi Jeńis Qasymbektiń, ónerkásipshiler men «Qazaqmys» korporatsııasy basshylyǵynyń qatysýymen ótken onlaın-keńeste 2020 jylǵy jergilikti qamtýdy damytý nátıjeleri men osy jylǵa arnalǵan josparlar, sondaı-aq taýar óndirýshilerdiń problemalyq máseleleri talqylandy.

«2020 jyldyń qorytyndysyna saı taýarlar boıynsha satyp alýdyń jalpy somasy 121,9 mlrd teńgeni, qazaqstandyq qamtý - 56,7 mlrd teńgeni nemese 46,5%-dy qurady. Onyń ishinde qaraǵandylyq óndirýshilerden 12,3 mlrd teńgege shıkizat emes taýarlar satyp alyndy. 2021 jylǵa arnalǵan josparlarǵa keletin bolsaq, «Qazaqmys« korporatsııasymen birlesip Memorandým jobasyna engizý úshin taýar óndirýshilerdiń tizimi ázirlendi. Jaqyn arada oǵan qol qoıý josparlanýda», - dep habarlady ónerkásip jáne ındýstrııalyq-ınnovatsııalyq damý basqarmasy basshysynyń mindetin atqarýshy Andreı Ýmantsev.

«Qazaqmys» korporatsııasy 2021 jyly shıkizattyq emes taýarlar boıynsha jergilikti qamtý úlesin 20 mlrd teńge deńgeıinde qamtamasyz etýdi josparlap otyr, bul ótken jylmen salystyrǵanda 8,4 mlrd teńgege artyq,

Satyp alýlardaǵy jergilikti mazmunnyń artýyna qaramastan, ımport úlesi aıtarlyqtaı úlken bolyp qalýda. Máselen, ótken jyly ónerkásip alyby negizinen Qazaqstanda óndirilmeıtin tehnıka men jabdyqtardy ımporttady.

Biraq, keńeste atap ótilgendeı, oblysta ónimniń belgili bir túrleri boıynsha ımportty almastyrýǵa múmkindik bar. Mysaly, kompanııaǵa jaryqdıodty shamdardy qaraǵandylyq óndirýshilermen tyǵyz yntymaqtastyq ornatý jáne olardy syrttan satyp almaý usynyldy. Sondaı-aq dánekerleý elektrodtaryn ımporttaý emes, olardy Qaraǵandy zaýytynda satyp alýǵa keńes berildi.

Jalpy korporatsııada Qaraǵandy oblysynyń taýar óndirýshileriniń áleýetin barynsha paıdalaný usynyldy.

«Satyp alýlarda jergilikti qamtý úlesin arttyrý boıynsha jumystar júrgizilýde, biraq sonymen birge yntymaqtastyq úshin rezervter bar, olardy biz iske asyrýymyz kerek. Jergilikti taýar óndirýshilerdi tartý úshin satyp alýlardyń barynsha ashyqtyǵyn qamtamasyz etý qajet», - dep tapsyrdy Jeńis Qasymbek.

Ónerkásip alyptarynyń satyp alýda jergilikti qamtýdy damytýy jónindegi jumys turaqty baqylaýda.