Qaraǵandy oblysynyń aýyldarynda ınvataksı jumys isteı bastady

QARAǴANDY. QazAqparat - Qaraǵandy oblysynda ınvataksı qyzmeti jeti qalada jumys isteıdi. Endi bul tegin qyzmetti aýyl turǵyndary da paıdalana alady, dep habarlaıdy QazAqparat tilshisi.

Memlekettik áleýmettik tapsyrys boıynsha Abaı aýdanynda ınvataksı qyzmeti ashyldy.

«Bizdiń aýdanda 2 750 múmkindigi shekteýli adam turady. Jergilikti atqarýshy bılik olarǵa qajetti jaǵdaıdy qamtamasyz etýge tyrysady. Biz bıýdjetten ınvataksı qyzmetin qurýǵa qarajat bóldik. Bul qyzmet múmkindigi shekteýli adamdardyń qajetti jerine jetýine múmkindik beredi. Invataksıdiń arqasynda múgedek jandar kontsertke, teatrǵa, kórmege, basqa da mádenı is-sharalarǵa qatysa alady», - dedi aýdan ákimi Baýyrjan Asanov.

Qyzmet úshin jeńil avtokólik jáne shaǵyn avtobýs qarastyrylǵan. Invataksı búkil aýdan boıynsha qyzmet kórsetedi. Arnaıy jabdyqtalǵan kólikti 1 toptaǵy múgedekter jáne jeke kómekshisi nemese arbasy bar múgedek balalar paıdalana alady.

Qazaqstanda áleýmettik saıasattyń basym baǵyttarynyń biri - múgedekterdiń jaǵdaıyn jaqsartý. Memleket tarapynan jeke kómekshi qyzmeti, ymdaý tili mamandarynyń kómegi usynylady. Kómek spektrine: gıgıenalyq zattar, arbalar, tıflo jáne sýrdo-quraldarmen, ońaltý ortalyqtaryna tegin joldamalarmen qamtamasyz etý jáne t. b. kiredi.