Qaraǵandy oblysynyń aýdanynda «Dımplommen – aýylǵa» barǵan 341 maman úıli boldy

OSAKAROV. QazAqparat – Qaraǵandy oblysynyń Osakarov aýdanynda jyl basynan «Dıplommen – aýylǵa!» baǵdarlamasy boıynsha 20 maman birrettik kóterme járdemaqy jáne turǵyn úı satyp alýǵa bıýdjetten 33 nesıe aldy, dep habarlaıdy QazAqparat tilshisi.

Búginde aýdanda kadr tapshylyǵy máselesi ótkir tur. Jumysshy mamandyqtarynan basqa bilikti dárigerler men muǵalimder jetispeıdi. Bul problemany sheshýge memlekettik baǵdarlamalardy iske asyrý múmkindik beredi. Olardyń biri – «Dıplommen – aýylǵa!» baǵdarlamasy pedagogtarǵa, dárigerlerge, mádenıet jáne sport qyzmetkerlerine jaqsy demeý bolyp tabylady. Jastardy jumyspen qamtamasyz ete otyryp, memleket te áleýmettik qoldaý kórsetedi.

Lıýdmıla Beloýsova oqýdy bitirgennen keıin birden Osakarov aýdanyna keldi. Aýdandyq ortalyq aýrýhananyń jansaqtaý bólimine medbıke bolyp jumysqa ornalasty.

«Bıyl «Dıplommen – aýylǵa!» baǵdarlamasynyń arqasynda turǵyn úı satyp alýǵa kóterme járdemaqy jáne nesıe aldym. Qolaıly úı taýyp, satyp aldym. Jaqynda meniń otbasym qonys toıyn toılady. Jas mamandar úshin mundaı baǵdarlamalar kóbirek bolsa jaqsy bolar edi, óıtkeni bul memleketten aıtarlyqtaı qoldaý. Shynymdy aıtsam, men óz úıime aqsha taba almas edim», – deıdi Lıýdmıla.

Osakarov kentiniń №1 tirek mektebiniń ınformatıka pániniń muǵalimi Muratbek Aıǵanat Nur-Sultanda bilim aldy. Ol da «Dıplommen – aýylǵa!» baǵdarlamasyn paıdalandy. Járdemaqy alǵannan keıin jeńildetilgen nesıege ótinish berýge sheshim qabyldaǵan. Muratbek Aıǵanat qazir baqytty úı ıesi.

«Jas mamandardy qoldaýdyń osyndaı baǵdarlamasy bar ekenine qýanyshtymyn. Meniń jaqsy jumysym, tamasha ujymym, al qazir óz úıim bar. Men ol jerge ata-anammen birge kóship keldim», – deıdi Muratbek Aıǵanat.

2009–2021 jyldar aralyǵynda Osakarov aýdanynda «Dıplommen – aýylǵa!» baǵdarlamasy boıynsha 590 adam jumyspen qamtyldy. Kóterme járdemaqydan basqa, 341 jas maman turǵyn úı satyp alýǵa bıýdjettik nesıe aldy.